سنڌ ۾ سڀني لاءِ قانون برابر هئڻ گهرجي، وزيرن، ايم پي ايز، ايم اين ايز، سردارن لاء هڪڙو ۽ ٻي عوام ۽ وڪيلن لاء ٻيو قانون، اهو ٻٽو معيار ڪنهن بہ صورت ۾ قبول ناهي؛ اياز لطيف پليجو

قومي عوامي تحريڪ جو سربراھ اياز لطيف پليجو باء پاس وٽ لڳل وڪيلن جي ڌرڻي ۾ شريڪ

حيدرآباد: قومي عوامي تحريڪ جو سربراھ اياز لطيف پليجو واڌو واھ گيٽ قاسم آباد حيدرآباد جي سامهون باء پاس وٽ لڳل وڪيلن جي ڌرڻي ۾ پھچي ويو. ان موقعي تي ڌرڻي کي خطاب ڪندي اياز لطيف پليجي چيو تہ سنڌ ۾ سڀني لاءِ قانون برابر هئڻ گهرجي، وزيرن، ايم پي ايز، ايم اين ايز، سردارن لاء هڪڙو قانون ۽ ٻي عوام ۽ وڪيلن لاء ٻيو قانون هجي اهو ٻٽو معيار ڪنهن بہ صورت ۾ قبول نہ آهي. اياز لطيف پليجي چيو تہ سنڌ ۾ قانون ۽ آئين جي حڪمراني ناھي. وزير، ايم پي ايز، اين اين ايز ۽ حڪومتي وڏيرا پنھنجون رياستون ٺاھي ويٺل آھن. پنھنجي پسند جا ايس ايس پيز ۽ ٻيا آفيسر مقرر ڪري انھن کان پنھنجا ناجائز ڪم وٺن ٿا. مخالفن خلاف انتقامي ڪاروايون ڪن ٿا. زمينن ۽ ملڪيتن تي قبضن، منشيات ۽ ٻين ڏوھارين جي سرپرستي ڪن ٿا.اياز لطيف پليجي چيو تہ سنڌ ۾ حڪومت نالي ڪا شي ڪونهي سمجهو تہ سرداري نظام آهي هڪڙي قبيلي جو سربراھ ويٺو آهي زرداري صاحب پنهنجي مرضي جي حڪومت ويٺو هلائي سنڌ جو عوام پاڻ سڀ ان جي رعيت آهيون، سردار جي مرضي آهي وڻيس زمينون کڻي ڇڏي، وڻيس ماڻهن کي مارائي ڇڏي، وڻيس تہ وڪيلن تي ايف آئي آر داخل ڪرائي ڇڏي، وڻيس تہ سنڌ جي ماڻهن کي لڏائي ڳوٺ خالي ڪرائي ڇڏي، وڻيس تہ ڪينال ٺاهي ڇڏي، انهي سردار زرداري جي مرضي آهي جيڪڏهن چئي تہ آئون سپاهي بہ ڪون هٽائيندس منهنجي مرضي آهي، سنڌ جي ماڻهن کي زرداري ۽ پيپلزپارٽي پنھنجو غلام سمجهي. اياز لطيف پليجي چيو تہ زرداري سمجهي ٿو تہ جنهن مون وٽ ايم پي اي، ايم اين اي، وزيرن ۽ سردار، وڏيرا يرغمال آهن، پر ان کان اها غلطي ٿي آهي تہ شايد وڪيل بہ يرغمال رهندا، پر وڪيل آزاد ۽ خودمختار آهن ڪنهن وڏيري يا پير مرشد جي چوڻ ۾ نہ ايندا۔ سنڌ ۾ جمهوريت جو صرف نالو آهي، سنڌ حڪومت وڪيلن سان زيادتي ڇو پئي ڪرائي؟، اڄ حڪومت ۾ آهن سڀاڻي نہ ڪون هوندا، انهن جا ڪيس ڪير وڙهندو۔ اياز لطيف پليجي چيو تہ سنڌ ۾ لاقانونيت جو راڄ آھي. ماڻھو پوليس وٽ وڃڻ کان خوف کائين ٿا. پوليس رشوت کانسواءِ ڪنھن غريب متاثر جي ڳالھ نٿي ٻڌي. طاقتور ماڻھو ۽ پئسي وارا ماڻھو پوليس کي استعمال ڪن ٿا. خريد ڪن ٿا ۽ مخالفن خلاف ڪجھ ھزارن ۾ ڪوڙي ايف آئي آر داخل ڪرائي انھن جي زندگي جھنم بنائي ڇڏين ٿا. اھڙي انسان دشمن نظام کي رد ڪريون ٿا. حيدرآباد جي وڪيلن جا مطالبا منظور ڪيا وڃن ۽ ايماندار آفيسر مقرر ڪري قانون ۽ انصاف جي حڪمراني قائم ڪئي وڃي.