شڪارپور پوليس پاران مقابلي دوران هڪ ڌاڙيل کي زخمي حالت ۾ گرفتار ڪرڻ جي دعويٰ

views | 05th Feb 2025 • سنڌي خبرون

زخمي حالت ۾ گرفتار ڪيل جوابدار جي سڃاڻپ عبدالستار شر جي نالي سان ٿي: ايس ايس پي شاهزيب چاچڙ

شڪارپور پوليس پاران مقابلي دوران هڪ ڌاڙيل کي زخمي حالت ۾ گرفتار ڪرڻ جي دعويٰ

شڪارپور (احسان ابڙو)لکيدر ٿاڻي جي پوليس جو ماڙي روڊ تي موٽرسائيڪل سوار 3 هٿياربند ڌاڙيلن سان مقابلو. هڪ ڌاڙيل زخمي حالت ۾ گرفتار ۽ ٻيا ڌاڙيل فرار ٿي ويا. ايس ايس پي شاهزيب چاچڙ جو چوڻ هو ته زخمي حالت ۾ گرفتار ڪيل جوابدار جي سڃاڻپ عبدالستار شر جي نالي سان ٿي آهي. اڻڄاتل هٿياربند ڏوھاري ڦرلٽ جي ارادي سان روڊ تي بيٺا هئا. ڊي ايس پي سٽي شڪارپور ميڊم پارس بکراڻي جي اڳواڻيءَ ۾ لکيدر ٿاڻي جي ايس ايڇ او الطاف ڪانڌرو پنهنجي ٽيم سان گڏ ڌاڙيلن سان پوليس مقابلو ڪيو. گرفتار ٿيل جوابدار کي طبي علاج لاءِ مقامي اسپتال منتقل ڪيو ويو آهي. شروعاتي جاچ موجب گرفتار ٿيل جوابدار ڦرلٽ، چوري، اسٽريٽ ڪرائم ۽ ٻين ڏوهن ۾ ملوث آهي. گرفتاري وقت ملزم جي قبضي مان هڪ غير قانوني پستول ۽ گوليون پڻ هٿ ڪيون ويون آھن. ايس ايس پي شڪارپور موجب ملزم جي ڪرمنل رڪارڊ جي وڌيڪ جانچ ڪئي پئي وڃي. جوابدار جي خلاف لکيدر ٿاڻي ۾ پوليس مقابلي ۽ غير قانوني هٿيار رکڻ جو ڪيس داخل ڪيو ويو آهي، ۽ وڌيڪ جاچ جاري آهي.