سڄي ملڪ وانگر نوشهروفيروز ۾ به ڪشميرين سان ٻڌي ۽ يڪجهتي جو ڏهاڙو ملهايو ويو

ڪشمير پاڪستان جي شہ رگ آهي ۽ ڪا به قوم پنهنجي شہ رگ دشمن جي هٿ ۾ رهڻ جي اجازت نه ٿي ڏئي سگهجي: اڳواڻ

نوشهروفيروز (ڊ ر) سڄي ملڪ وانگر نوشهروفيروز ۾ به ڪشميرين سان ٻڌي ۽ يڪجهتي جو ڏهاڙو ملهايو ويو. ان سلسلي ۾ ايڊيشنل ڊپٽي ڪمشنر ون لياقت علي لنڊ جي اڳواڻي ۾ ڊپٽي ڪمشنر آفيس کان مين روڊ تائين ريلي ڪڍي وئي. ريلي ۾ شريڪ ماڻهن والاريل ڪشمير ۾ ڀارتي فوج جي ظلمن خلاف سخت نعريبازي ڪئي. ريلي ۾ ضلعي جي مختلف سرڪاري کاتن، سوشل ويلفيئر، پوليس، تعليم، روينيو، لوڪل گورنمينٽ ۽ ٻين کاتن جي آفيسرن شرڪت ڪئي. ريلي جي آخر ۾ شرڪت ڪندڙن ۽ ميڊيا جي نمائندن کي خطاب ڪندي اڳواڻن چيو ته ڪشمير پاڪستان جي شہ رگ آهي ۽ ڪا به قوم پنهنجي شہ رگ دشمن جي هٿ ۾ رهڻ جي اجازت نه ٿي ڏئي سگهجي. هن چيو ته ڀارتي فوج ظلم ۽ بربريت سان ڪشميري عوام جا حق غصب نٿي ڪري سگهي ۽ پاڪستاني عوام هر فورم تي پنهنجي ڪشميري ڀائرن جي حمايت جاري رکندو ۽ اسان گڏيل قومن کي اپيل ڪريون ٿا ته هو ڪشميري عوام کي آزادي ڏيارڻ لاءِ پنهنجي قراردادن تي عملدرآمد ڪرائي ۽ اهو ڏينهن پري ناهي جڏهن ڪشميرين کي آزادي جو حق ملندو.