ڏوڪري جي بوائز هاءِ اسڪول ۾ پوليو مهم جي حوالي سان تقريب منعقد

تقريب ۾ ليڊي هيلٿ ورڪرز، استادن، شاگردن، شاگردياڻين ۽ سياسي سماجي اڳواڻن جي به شرڪت

ڏوڪري(اطهر ميمڻ) ڏوڪري ۾ پوليو مهم جي حوالي سان تقريب ڪوٺائي وئي، 3 فيبروري تي پوليو مهم شروع ٿيڻ جي حوالي سان جاڳرتا تقريب بوائز هاءِ اسڪول ڏوڪريءَ ۾ ڪوٺائي وئي تقريب ۾ ڊي ايڇ او ڊاڪٽر شوڪت علي ابڙو، ڊاڪٽر مختيار چنو، ھيڊماستر نثار احمد سولنگي، تعلقہ اسپتال جي ميڊيڪل آفيسر ڊاڪٽر ظفر ﷲ موريو، محمد عالم مارفاڻي، ارشاد علي مگسي، ليڊي هيلٿ ورڪرز سپروائيزر شهربانو مڱريو، ميڊم شبنم منگي، نياز سوهو غلام محمد ڏيرو ذيشان شهداد ميمڻ ساجد حسين سولنگي ۽ استادن، شاگردن، شاگردياڻين ۽ ليڊي هيلٿ ورڪرز وڏي انگ ۾ شرڪت ڪئي. ان موقعي تي ڊي ايڇ او شوڪت علي ابڙو، ايم ايس ڊاڪٽر ظفر ﷲ موريو، ھيڊماستر نثار احمد سولنگي، ارشاد علي مگسي ۽ ٻين خطاب ڪندي چيو ته 3 فيبروري کان 7 فيبروري تائين پوليو مهم رهي آهي ان جي ڪري بوائز هاءِ اسڪول ۾ جاڳرتا تقريب ڪوٺائي وئي آهي. هنن چيو ته استاد هن سماج جا بهترين فرد آهن استاد ئي واحد آهن جيڪي معاشري ۾ تبديلي آڻي سگهن ٿا. هنن چيو ته استاد کي گهرجي ته پوليو جي ٽيم سان تعاون ڪري اسڪولن، توڙي پنهنجي پنهنجي علائقن ۾ پوليو جي حوالي سان والدين ۽ ٻارڙن کي آگاهي ڏيڻ ته جئين پوليو جي موذي مرض کان بچي سگهجي. تقريب کان بعد ۾ بوائز هاءِ اسڪول کان اسپتال تائين ريلي ڪڍي وئي.