تڪراري ڪئنال سنڌين جي نسل ڪشي جي گھڻ رُخي حڪمت عملي جو مرحليوار قدم آهي: اياز لطيف پليجو

سنڌ جي عوام کي پاڻي لاءِ تڙپائي مارڻ جو منصوبو جوڙيو ويو آهي

حيدرآباد (بيورو) قومي عوامي تحريڪ جي سربراھ اياز لطيف پليجي چيو تہ سنڌو درياءَ مان 6 نوان ڪئنال ڪڍڻ سنڌين جي نسل ڪشي جي گھڻ رُخي حڪمت عملي جي سوچيل سمجھيل مرحليوار قدم آهي.سنڌو درياءَ مان ڪينال ڪڍڻ سان سنڌ کي رڻ پٽ ۽ بيابان ۾ تبديل ڪري سنڌ جي عوام کي پاڻي لاءِ تڙپائي مارڻ جو منصوبو جوڙيو ويو آهي درياءُ مان زبردستي ڪئنال ڪڍڻ سان سنڌو درياءُ سوڪهڙي جو شڪار ٿي ويندو.اياز لطيف پليجي چيو تہ پيپلز پارٽي جي حڪمراني سنڌ کي المين جي سرزمين ٺاھي ڇڏيو آھي. پ پ حڪومت جا وزير مرضي جا ايس ايس پي رکن ٿا، پسند جا تپيدار ۽ مختيارڪار رکن ٿا، ڊي سي بہ مرضي جا رکن ٿا، سمورن کاتن ۾ پنھنجو حڪم مڃيندڙ آفيسر مقرر ڪن ٿا، جيڪو آفيسر حڪم نٿو مڃي ان جي نوڪري داءُ تي آندي وڃي ٿي. اياز لطيف پليجي چيو تہ پوليس کي خبر آھي تہ ڪيترو بہ ڪرائيم ٿئي، انھن جي نوڪري کي ڪو بہ لھر ئي لوڏو ناھي، جيستائين ايم پي اي، ايم اين اي ۽ وزير صاحب جي مرضي جا ڪم ٿيندا رھندا تيستائين زمين ۽ آسمان لڏي وڃن تڏھن بہ ڪجھ نہ ٿيندو.ايس ايس پي کان وٺي ايس ايچ او تائين ڪنھنجي ڪرسي کي لوڏو نہ ايندو.