سنڌو درياءَ مان 6 نوان ڪئنال ڪڍڻ سان سنڌ بنجر ٿيڻ سان گڏ ڏڪار جو شڪار ٿي ويندي: اياز لطيف پليجو

حيدرآباد(بيورو) قومي عوامي تحريڪ جي سربراھ اياز لطيف پليجي چيو آھي تہ سنڌو درياھ تي حملو ڪندڙن سان پيپلزپارٽي گڏ آھي سنڌو درياءَ مان 6 نوان ڪئنال ڪڍڻ سان سنڌ بنجر ٿيڻ سان گڏ ڏڪار جو شڪار ٿي ويندي ۽ جر جو پاڻي زھريلو ٿي ويندو. سمنڊ ٺٽو، بدين ۽ سجاول ضلعن کي مڪمل ڳڙڪائي ويندو. سنڌو درياھ اسان جو آھي ان تي قبضو ٿيڻ ھرگز نہ ڏينداسين. پيپلزپارٽي چاھي ٿي تہ سنڌي ماڻهو خوشحال ٿيڻ بدران اسان جا غلام ھجن پيپلزپارٽي پنهنجي 16 سالن جي اقتداري دور دوران سنڌ کي تباهي کان سواءِ ڪجھ بہ نہ ڏنو آهي. اياز لطيف پليجي چيو تہ حڪمرانن ڪرپشن کي ڌنڌو بنائي ڇڏيو آھي. عوام بنيادي حقن ۽ انصاف کان محروم آھي. طاقتور ماڻھو انصاف خريد ڪن ٿا. اياز لطيف پليجي چيو تہ سنڌ حڪومت جي ادارن کي ڪرپشن کوکلو بنائي ڇڏيو آھي. عوام جي سھولتن لاءِ ٺھيل ادارا عوام آزار بنيل آھن. اربين روپين جي بجيٽ ڪاغذن ۾ خرچ ڪري ھڙپ ڪئي وڃي ٿي. ٻيلو کاتو، زراعت کاتو، بلديات، فشريز، صحت، تعليم، ورڪس، پوليس، اريگيشن، روينيو، خوراڪ سميت سمورا کاتا عوام کي بنيادي قانوني حق نہ ڏئي رھيا آھن. جنھنڪري غريب عوام جي حالت بدحال آھي. اياز لطيف پليجي چيو تہ ڏوھاري پوليس جي پڪڙ کان پري آھن باقي غريب عوام کي تنگ ڪري لٽيو پيو وڃي. ھر شھر منشيات جو ڳڙھ بنيل آھي. منشيات فروشن کي وزيرن ۽ پوليس جي سرپرستي حاصل آھي. ايم پي ايز، ايم اين ايز ۽ وزير مرضي جا آفيسر مقرر ڪري پنھنجي مرضي جا ڪم وٺن ٿا. عملدارن کي مخالفن خلاف استعمال ڪيو وڃي ٿو. اياز لطيف پليجي چيو تہ ڪرپشن جي خاتمي سان انصاف ۽ شفافيت قائم ٿيندي. ماڻھن کي بنيادي انساني حق ملندا سنڌ حڪومت ۽ وفاقي حڪومت ھنر مند نوجوانن کي روزگار لاءِ آسان شرطن تي قرض فراھم ڪري. سرڪاري زمين بي زمين ھارين کي ڏني وڃي. زراعت جي بحالي لاءِ آبادگارن کي قرض ڏنا وڃن.