پنوعاقل: ڪچي ۾ جتوئي مهر خوني تڪرار وڌيڪ ٻن ڀائرن جون حياتيون ڳڙڪايو ويو

ڌرين ۾ هلندي خوني جھيڙي سبب مارجي ويلن جو انگ وڌي 11 ٿي ويو

پنوعاقل (رپورٽر) ڪچي جي رضا ڳوٺ ۾ جتوئي مهر خوني تڪرار تان وڌيڪ 2 ڀائر مارجي ويا، هٿياربندن جي فائرنگ ۾ امداد جنگو مھر ۽ سندس ڀاءُ ابرار عرف ابراھيم جنگو مھر مارجي ويا، غلام فريد جنگو مھر سخت زخمي ٿي پيو جنهن کي تعلقي اسپتال پنوعاقل منتقل ڪيو ويو، مقتولن جا لاش لوڊرن تي کڻي اسپتال منتقل ڪيا ويا، علائقي واسين جو چوڻ هو ته ڪچي ۾ جتوئي ۽ جنگو مھر ڌرين ۾ ھڪ سال اڳ ٻيلي کاتي جي سرڪاري زمين جا مالڪي تان جھيڙو شروع ٿيو، ھڪ سال اڳ مھر ڌر جي حملي ۾ جتوئي ڌر جا ڇھ ڄڻا مارجي ويا ھئا مھرن جا ٽي زخمي ٿي ھئا جن مان ٻن دم ڏئي ڇڏيو هو، ڌرين ۾ وقفي وقفي سان ڇڪتاڻ جاري آهي، ڪجھ مھينا اڳ به مھر ڌر جو ھڪ ڄڻو مارجي ويو ھو جنھن جو الزام به جتوئي ڌر مٿان لڳايو ويو، ڌرين ۾ هلندي خوني جھيڙي سبب مارجي ويلن جو انگ وڌي 11 ٿي ويو.