ٺل ۾ قومي عوامي تحريڪ پاران سنڌو درياءَ مان نوان ڪئنال ڪڍڻ خلاف ريلي

سنڌو درياءَ مان نوان ڪئنال ڪڍي سنڌ کي سڪائڻ جو منصوبو جوڙيو ويو آهي جيڪو قبول نه ڪيو ويندو: اڳواڻ

ٺل(رپورٽر) قومي عوامي تحريڪ ضلعي جيڪب آباد پاران ٺل شهر ۾ سنڌو درياءَ مان 6 نوان ڪئنال ڪڍڻ خلاف قومي عوامي تحريڪ جي مرڪزي جنرل سيڪريٽري مظهر راهوجو ۽ مرڪزي سينئر نائب صدر ايڊووڪيٽ روشن ڪنراڻي ٻين جي اڳواڻي ۾ احتجاجي ريلي ڪڍي مين بس اسٽاپ تي ڌرڻو هنيو. ان موقعي تي ريلي کي قومي عوامي تحريڪ جي مرڪزي جنرل سيڪريٽري مظھر راھوجي خطاب ڪندي چيو تہ نوان ڪئنال ڪڍي سنڌ کي سڪائڻ جو منصوبو آهي جنهن کي سنڌ جا ماڻهو ڪڏهن بہ قبول نہ ڪندا ۾ سنڌين کي اقليت ۾ تبديل ڪرڻ جي سازش ٿي رهي آهي. سنڌو درياھ سنڌ جو ساھ آھي 6 نوان ڪئنال ڪڍڻ سان سنڌو درياھ جو وجود ختم ٿيڻ سان زرخيز سنڌ مڪمل بنجر ٿي ويندي. ملڪ جي ترقي ناهي سنڌ تباھ نہ ڪيو وڃي. مظھر راھوجي چيو تہ سنڌ جي ماڻهن کي پنهنجي حق حڪمراني کان پري رکي انهن کي ديوار سان لڳايو پيو وڃي سنڌ جي لکين ايڪڙ زمين مختلف ڪمپنين کي ڏئي سنڌي ماڻهن کي پنهنجي ڌرتي تان بي دخل ڪرڻ جي سازش ڪئي پئي وڃي سنڌ کي بنجر بنائڻ جو منصوبو آھي. آصف علي زرداري کي سنڌو درياھ مان ڪئنال ڪڍڻ جو ڪو بہ اختيار ناھي.6 نوان ڪئنال ڪڍڻ جو منصوبو سنڌ جي ڪروڙين ماڻھن کي پاڻي جي ڦڙي ڦرڙي لاءِ تڙپائي مارڻ ۽ لکين ايڪڙ زمين بنجر بنائي سنڌ کي معاشي طور قتل ڪرڻ جو منصوبو آھي. پيپلز پارٽي اقتدار عيوض سنڌ جو پاڻي ۽ وسيلا وڪڻي ڇڏيا آھن. قومي عوامي تحريڪ جي مرڪزي سينيئر نائب صدر ايڊووڪيٽ روشن ڪنراڻي خطاب ڪندي چيو تہ سنڌو درياھ جي وھڪري ۾ رڪاوٽون وجھڻ وارو چولستان ڪئنال سميت ڪو بہ منصوبو قبول ناھي. نواز ليگ، پيپلزپارٽي، ارسا ۽ واپڊا ھميشہ سنڌ کي ڀڙڀانگ ۽ بيابان بنائڻ وارا منصوبا جوڙيا آھن. ڏيڍ سئو سالن کان سنڌ جي پاڻي تي ڌاڙا ھنيا پيا وڃن. ٿل ڪئنال، چشمه جهلم لنڪ ڪينال ۽ ٻين ڌاڙيل واھن ذريعي سنڌ جو پاڻي چوري ڪيو پيو وڃي. سنڌو درياھ تي ڌاڙي جي ڪري سنڌ ۾ لکين ايڪڙ زمين ڀڙڀانگ آھي. سنڌ کي پنھنجي حصي جو پاڻي نٿو ملي. سمنڊ ۾ پاڻي ڇوڙ نہ ٿيڻ ڪري سمنڊ اڳتي وڌي آيو آھي ايڊووڪيٽ روشن ڪنراڻي چيو تہ چيو تہ سنڌ جي زرعي معيشت جي تباھي، سنڌو درياھ کي سڪائڻ وارا منصوبا ملڪ دشمن منصوبا آھن، انڪري ملڪ دشمن، درياھ دشمن منصوبا بند ڪيا وڃن. سنڌ کي پنھنجي حصي جو پاڻي ڏنو وڃي سمنڊ جو پاڻي زير زمين ستن ضلعن تائين پھچي ويو آھي۔ زھريلي پاڻي جي ڪري لکين ماڻھو ھيپاٽائيٽس، چمڙي ۽ ٻين خطرناڪ بيمارين ۾ مبتلا ٿي ويا آھن.