ايڪس (ٽوئيٽر) بمقابلہ بليواسڪائي

تحرير: سيد غلام مصطفي شاھ

بليو اسڪائي هڪ نئون سوشل ميڊيا پليٽ فارم آهي جيڪو ايڪس ( ٽوئيٽر) سان هڪجهڙائي رکي ٿو. بليو اسڪائي جو نشان (لوگو) بہ ايڪس (ٽوئيٽر) وانگر آهي جنهن ۾ پوپٽ جو نشان آهي،جڏهن تہ ٽوئيٽر ۾ نيري رنگ جو پکي هوندو پر ايلون مسڪ جڏهن ٽوئيٽر کي خريد ڪيو تہ ان جو نالو ٽوئيٽر بجاءِ ايڪس رکيو ويو ۽ نشان (لوگو) پڻ تبديل ڪيو ويو ۽ انگريزي ٻوليءَ جو لفظ "ايڪس " لوگو جي جاءِ تي نشان طور ڏنو ويو. اڄڪلھ بليو اسڪائي نئون سوشل ميڊيا پليٽ فارم آهي ۽ ان جي مقبوليت ۾ اضافو تڏهن آيو جڏهن ڊونلڊ ٽرمپ ايلون مسڪ کي ڪابينا ۾ شامل ڪيو. ايڪس (ٽوئيٽر) جا ڪافي صارف هاڻي بليو اسڪائي کي اهميت ڏئي رهيا آهن ۽ پنهنجا اڪائونٽ بليو اسڪائي ۾ ٺاهي رهيا آهن. ٻہ ڏينهن پهريان تائين بليو اسڪائي يوزرس جو تعداد 7.16 ملين تائين پهچي چڪو آهي.بليو اسڪائي ۾ جيڪي فيچرس ڏنا ويا آهن اهي هوم، سرچ، نوٽيفڪيشن، چيٽ ۽ لسٽ شامل آهن. بليو اسڪائي استعمال ڪندڙ هن پليٽ فارم تي تبصرا، ري پوسٽ، ۽ لائيڪ پڻ ڪري سگهن ٿا. بليو اسڪائي ايپ کي 2019ع ۾ گوگل پلي اسٽور تي آندو ويو پر هن جي مقبوليت نہ جي برابر هئي ڇا ڪاڻ تہ بليو اسڪائي کان پهريان واٽس ايپ، فيس بڪ، ٽوئيٽر، انسٽاگرام جهڙيون مشهور ايپليڪيشنس پنهنجو ڌاڪو ڄمايو ويٺيون هيون.هي ايپليڪيشن استعمال ڪندڙن جو چوڻ آهي تہ هي ايپليڪيشن ٽوئيٽر جو متبادل آهي ۽ ايڪس (ايڪس) سان اڄڪلهہ سندس مقابلو عروج تي آهي،ڇو تہ ڊونلڊ ٽرمپ جا مخالف هن پليٽ فارم کي وڌيڪ ترجيح ڏئي رهيا آهن. بليو اسڪائي ۽ ايڪس ( ٽوئيٽر) ۾ هڪجهڙائي ان ڪري بہ آهي تہ بليو اسڪائي جو بنياد جيڪ ڊورسي رکيو هو جيڪو ٽوئيٽر جو اڳوڻو سي اي او رهي چڪو آهي. پر اهو چيو پيو وڃي تہ جيڪ ڊورسي مارچ 2024ع کان بليو اسڪائي جو ميمبر نہ رهيو آهي. جڏهن تہ اهو پڻ چيو پيو وڃي ته جيڪ ڊورسي سيپٽمبر 2023ع ۾ پنهنجو اڪائونٽ بليو اسڪائي تان ئي ختم ڪري ڇڏيو هو. هاڻي بليو اسڪائي جو انتظام جي گرابر وٽ آهي جيڪو هاڻي بليو اسڪائي ايپ جو سي اي او آهي. بليو اسڪائي ايپ پنهنجي ايپ کي بهتر بڻائڻ لاءِ ان ۾ ڏينهون ڏينهن اضافو ڪري رهيو آهي.بليو اسڪائي جي هڪ خاصيت اها بہ آهي تہ هن تي موڪليل ڊيٽا کي هو پاڻ وٽ محفوظ ڪري ٿو ۽ ٻئي ڪنهن سرور يا ايپ تائين انجي رسائي ناممڪن آهي. ڪجھ ڏينھن کان اها ايپ وڌ کان وڌ ڊائون لوڊ ٿيندڙ ايپ پڻ آهي. مشهور ڳائڻي ليزو، گريگ ڊيوس، بين اسٽيلر، جمي لي ڪرٽس، اور پينن، اوسوالٽ سميت شوبز سان وابستہ ٻيا ماڻهو پڻ هن پليٽ فارم طرف اچي رهيا آهن. سوچڻ جي ڳالهه آهي ۽ ماڻهن جي ذهنن ۾ اهو سوال بہ اڀرندو هوندو تہ بليو اسڪائي جنهن ٽوئيٽر کي ايڏو وڏو ٽف ٽائيم ڏنو آهي ان جي ڪمائي يا سيڙپ جو ڪهڙو ذريعو آهي جو دنيا جي کرب پتي شخص سان مقابلو پيو ڪري. اصل ۾ انجي سيڙپ ۾ ڪافي ماڻھن جي گڏيل سيڙپ هئي ۽ ڪمائي مان انهن جو حصو نڪرندو پئي ويو ۽ اڄڪلھ بليو اسڪائي اڃا تہ ميدان ماريندي پئي وڃي، مستقبل ۾ ڏسجي تہ اهو مقابلو ڪير ٿو کٽي.