ايس ٽي پي پاران ڪراچي ۾ رٿيل احتجاج 24 نومبر بدران 8 ڊسمبر تي ٿيندو: ڊاڪٽر قادر مگسي

20نومبر سڀاڻي سڪرنڊ بائي پاس تي لڳنڌڙ ڌرڻي جي تيارين تي اطمينان جو اظهار

حيدرآباد ( احسان ابڙو )سنڌ ترقي پسند پارٽي جي چيئرمين ڊاڪٽر قادر مگسي جي صدارت ۾ پارٽي جي باڊي جو هنگامي اجلاس ٿي گذريو، اجلاس ۾ سنڌو درياءِ تي ڪئنال ٺاهڻ واري منصوبي خلاف جاري احتجاجي تحريڪ جو جائزو ورتو ويو. 20 نومبر سڀاڻي سڪرنڊ بائي پاس تي لڳنڌڙ ڌرڻي جي تيارين تي اطمينان جو اظهار ڪيو ويو. اجلاس ۾ 24 نومبر تي ڪراچي ۾ رٿيل احتجاج جي تاريخ تبديل ڪري 8 ڊسمبر تي رکيو ويو. اجلاس کي خطاب ڪندي سنڌ ترقي پسند پارٽي جي چيئرمين ڊاڪٽر قادر مگسي چيو ته ايس ٽي پي پاران سنڌو درياءَ تي ڪئنال ٺاهڻ واري منصوبي خلاف جاري احتجاجي تحريڪ جي سلسلي ۾ 24 نومبر ڪراچي ڦوهارا چوڪ تي احتجاج هاڻي 8 ڊسمبر تي ٿيندو ڇاڪاڻ ته 24 نومبر تي پي ٽي آئي احتجاج جو سڏ ڏنو آهي. جيڪو هُن جي سياسي زندگي ۽ موت جي سوال تي ٻڌل آهي ته ان ڏينهن انديشو آهي ته پوليس ۽ پي ٽي آئي ڪارڪنن جي وچ ۾ چڪريون هلنديون رهنديون ۽ اسان نٿا چاهيون ته ٻن سياسي پارٽين جي ڪارڪنن جي وچ ۾ ٽڪراءُ وارو ماحول جُڙي انڪري 24 نومبر جي بدران هاڻي ڪراچي ۾ 8 ڊسمبر تي سنڌو درياءِ تي ڪئنال جوڙڻ واري منصوبي خلاف احتجاج ڪيو ويندو. جڏهن ته 24 تاريخ سڄي سنڌ ۾ ضلعن ۾ احتجاجي مظاهرا ڪيا ويندا. 27 نومبر تي مٺي ٿرپارڪر، 28 نومبر تي عمرڪوٽ، 29 نومبر تي سانگهڙ، 03 ڊسمبر تي جيڪب آباد، 4 ڊسمبر تي ڪنڌڪوٽ ڪشمور ۽ 05 ڊسمبر تي شڪارپور ۾ سنڌ ترقي پسند پارٽي جي مرڪزي قيادت جي اڳواڻي ۾ احتجاجي مظاهرا ڪيا ويندا.سنڌ ترقي پسند پارٽي جي چيئرمين ڊاڪٽر قادر مگسي وڌيڪ چيو ته سنڌو درياءِ سنڌ جي ملڪيت آهي ان سنڌين جو دائمي، آفاقي ۽ قانوني حق آهي ڪنهن کي به اها اجازت نه ڏني ويندي ته سنڌين کان سندن جيئڻ جو ذريعو کسي. هن چيو ته ماضي ۾ جئين جنرلن ۽ آمرن جي دور ۾ سنڌ سياسي جدوجھد ڪري سنڌو درياءِ کي بچايو آهي هاڻي به اها سياسي جدوجھد سان هنن حڪمرانن کي شڪست ڏيندي. هن سڀاڻي سڪرنڊ ۾ رٿيل ڌرڻي جي لاءِ عوام کي اپيل ڪئي ته هو 20 نومبر سڪرنڊ جي جلسي ۾ ڀرپور شرڪت ڪري حڪمرانن کي اهو پيغام ڏين ته سنڌ جا ماڻهو پنهنجي سنڌو درياءِ جا وارث آهن اهي سنڌو درياءِ خلاف ڪنهن به سازش کي ڪامياب ٿيڻ نه ڏيندا. اجلاس ۾ سنڌ ترقي پسند پارٽي جي مرڪزي وائيس چيئرمين حيدر شاھاڻي ، هوت خان گاڏهي، ڊاڪٽر عبدالحميد ميمڻ ، قادر چنا، امتياز سمون ،ڊاڪٽر سومار مڱريو ،عاشق سولنگي، خدا بخش درس، ڊاڪٽر مظھر ميمڻ ۽ٻين پاران شرڪت ڪئي وئي