سنڌو درياھ تي مسلسل ڌاڙن سنڌ جي لکين ايڪڙ زمين ڀڙڀانگ ڪري ڇڏي آھي: اياز لطيف پليجو

سنڌ ۾ جھنگ جو قانون آھي، جيڪو جيترو طاقتور آھي، اھو بادشاھ بڻجي ڦرلٽ ۽ دھشت جو راڄ قائم ڪيون ويٺو آھي

حيدرآباد (بيورو) قومي عوامي تحريڪ جي سربراھ اياز لطيف پليجي چيو تہ سنڌ ۾ جھنگ جو قانون آھي. جيڪو جيترو طاقتور آھي، اھو بادشاھ بنجي ڦرلٽ ۽ دھشت جو راڄ قائم ڪيو ويٺو آھي.اياز لطيف پليجي چيو تہ سنڌو درياھ تي مسلسل ڌاڙن سنڌ جي لکين ايڪڙ زمين ڀڙڀانگ ڪري ڇڏي آھي۔ سمنڊ ٺٽي، سجاول ۽ بدين جي ساحلي پٽي وارا تعلقا تيزي سان ڳڙڪائي رھيو سمنڊ ۾ درياھ جو ڇوڙ نہ ٿيڻ ڪري تمر جا ٻيلا ختم ٿي ويا آھن۔ ڪوٽڙي کان ھيٺ سمنڊ تائين درياھ جي ڪنڌي سان رھندڙ لکين آبادي غربت، بک، بدحالي جو شڪار ٿي وئي آھي.اياز لطيف پليجي چيو تہ پيپلز پارٽي ۽ زرداري مافيا سنڌ کي بک، بدحالي، ڌاڙيل راڄ، منشيات، ڪرپشن، ميرٽ جي لتاڙ ۽ لاقانونيت جي باھ ۾ اڇلائي ڇڏيو آھي. سنڌ جا ڪرپٽ حڪمران نٿا چاهين تہ سنڌ ۾ ميرٽ ھجي، تعليم ۽ سائنس ھجي، روزگار ۽ خوشحال ھجي. پيپلزپارٽي جي حڪمرانن سنڌ جو ڪوئلو، گئس، ساحلي پٽي، ڪوھستان، ڪراچي سميت وڏن شھرن جون زمينون، ٻيٽ، ڪينجھر، ڪارونجھر، پاڻي ۽ ٻيا وسيلا چوٿون ڀيرو اقتدار ملڻ خاطر وڪڻي ڇڏيا آھن. اياز لطيف پليجي چيو سنڌ حڪومت سنڌي ماڻهن کي اصل مسئلن تان ڌيان ھٽائڻ لاءِ ڌاڙيل راڄ ۽ بدامني کي ختم نٿي ڪري. مھانگائي ذريعي عوام جو معاشي قتل ڪيو پيو وڃي. سنڌ حڪومت جا سمورا کاتا عوام آزار بنجي ويا آھن. اياز لطيف پليجي چيو تہ پيپلز پارٽي حڪومت سنڌ ۾ تعليم، صحت، روزگار، زراعت، صنعت، آئي ٽي ٽيڪنالاجي، خوشحالي ڏيڻ بدران سنڌ جي ماڻھن کي پينو فقيرن جو لشڪر بنائڻ چاھي ٿي. سنڌي ماڻھن ۾ پنھنجن بنيادي حقن لاءِ سياسي مزاحمت پيدا نہ ٿئي، جرئت نہ ٿئي، انھن جي اجتماعي آواز کي دٻائڻ ۽ اصل مسئلن تان ڌيان ھٽائڻ لاءِ ڌاڙيل ڪلچر کي مضبوط ۽ طاقتور ڪيو ويو آھي.