سنڌياڻي تحريڪ جي باني ۽ ناليواري فنڪاره جيجي زرينا بلوچ جي 19هين ورسي ملهائي وئي

قومي عوامي تحريڪ ۽ سنڌياڻي تحريڪ جي اڳواڻن جيجي زرينا بلوچ جي آخري آرامگاهه تي حاضري ڀري ڀيٽا پيش ڪئي

حيدرآباد(بيورو) قومي عوامي تحريڪ جي سڏ تي سنڌياڻي تحريڪ جي باني اڳواڻ، اديب، استاد ۽ قومي فنڪاره مادر سنڌ جيجي زرينہ بلوچ جي 19ھين ورسي جي موقعي تي . حيدرآباد ۾ قومي عوامي تحريڪ ۽ سنڌياڻي تحريڪ جي مرڪزي اڳواڻن الطاف خاصخيلي، خادم سمون، آغا عباس، نذير بليدي، رب ڏنو ملڪ، بابو ميمڻ، رفيق ڪنراڻي، معشوق چانڊيو، انور عمراڻي، الطاف ناگراج، ياسر ابڙو، مھراڻ حب، غلام نبي سومرو، سنڌياڻي تحريڪ جي مرڪزي جنرل سيڪريٽري نصرت خاصخيلي، صبا سمون، شائسته ابڙو، سونھن ابڙو، رخسانه بھلڪاڻي ۽ ٻين جي اڳواڻي ۾ قاسم آباد ۾ علمدار چوڪ ڀرسان مزار تي پھچي اجرڪ ۽ گلن جي چادر چاڙھي جيجي زرينہ بلوچ جي جدوجھد تي ڳالھائي کيس لفظن جي ڀيٽا پيش ڪئي. ان موقعي تي قومي عوامي تحريڪ ۽ سنڌياڻي تحريڪ جي اڳواڻن چيو تہ جيجي زرينه بلوچ پنهنجي گيتن وسيلي سنڌ ۾ سجاڳيءَ جو پيغام ڏنو، قومي ڪاز ۾ ھُوءَ ھميشہ اڳڀري رهي. جيجي زرينه بلوچ ضياءَ جي مارشلا دور ۾ سختيُون برداشت ڪيون ، لانگ مارچن کان ويندي سنڌ جي بقا لاء ٿيندڙ احتجاجن مظاھرن ۾ اڳيان اڳيان رھي ، سنڌياڻي تحيڪ جي قيادت ڪئي. جيجي زرينہ قومي ۽ طبقاطي جدوجھد ۾ روح ڦوڪڻ سان گڏ سنڌي سھرن کي بہ نئون روپ ڏنو جيڪي اڄ تائين گونجن ٿا. سنڌياڻي تحريڪ جي وجُود سندس ڪاوشُن جو نتيجو آھي، ھُوءَ ھڪئي وقت استاد بہ ھئي، قومي فنڪاره، اديب ، ليکڪا بہ ھئي، جيجي هميشه لاء امُر ٿي وئي ۽ سندس يادُون هميشه ياد رهنديُون. اڳواڻن چيو تہ جيجي زرينه بلوچ پنھنجو تسلسل اياز لطيف پليجو جي روپ ۾ ڏئي وئي آھي، جيڪو جيجي زرينه جو لخت جگر آھي ۽ سنڌي قوم کي بيدار ڪرڻ ۾ رڌل آھي.