ڪراچي ۾ سنڌ فوڊ اٿارٽي جي اهتمام هيٺ خوراڪ جي عالمي ڏينهن تي آگاهي ريلي ڪڍي وئي

سنڌ فوڊ اٿارٽي جو ملاوٽ تي زيرو ٽالنرنس آهي ۽ مدي خارج خوراڪ جي وڪري کي ڪنهن صورت برداشت نه ڪيو ويندو: مزمل حسين هاليپوٽو

ڪراچي (اسٽاف رپورٽر) سنڌ فوڊ اٿارٽي مختلف يونيورسٽين جي شاگردن، فوڊ بزنس جي نمائندن، اين جي اوز، سرڪاري ادارن ۽ زرعي برادري جي نمائندن سان گڏجي ڪراچي ۾ عالمي يوم خوراڪ 2024 ملهايو ۽ آگاھي ريلي ڪڍي. هن سال جو موضوع "بهتر زندگي ۽ بهتر مستقبل لاءِ خوراڪ جو حق" هو، جيڪو ان ڳالهه جي اهميت کي اجاگر ڪري ٿو ته هر ماڻهو کي مناسب، غذائيت سان ڀرپور ۽ محفوظ خوراڪ تائين رسائي حاصل هجي. تقريب کي خطاب ڪندي ڊائريڪٽر جنرل سنڌ فوڊ اٿارٽي مزمل حسين هاليپوٽي چيو ته خوراڪ جي سلامتي ۽ بک خلاف جنگ زندگي جي معيار کي بهتر بڻائڻ ۽ پائيدار ترقي لاءِ ضروري آهي. هن وڌيڪ چيو ته سنڌ فوڊ اٿارٽي صوبي جي سڀني ضلعن ۾ خوراڪ جي حفاظت کي يقيني بڻائڻ لاءِ سرگرم عمل آهي ۽ آگاھي مهم ذريعي عوام کي صحت مند غذا ۽ خوراڪ جي صفائي جي اهميت کان واقف ڪيو پيو وڃي. مزمل حسين هاليپوٽي وڌيڪ چيو ته سنڌ فوڊ اٿارٽي ايڪٽ تحت ڪو به فوڊ بزنس سنڌ فوڊ اٿارٽي جي لائسنس کان سواءِ ڪرڻ غير قانوني آهي. اسان فوڊ اٿارٽي کي فعال ڪيو آهي ۽ پهرين انساني وسيلن تي ڪم ڪيو آهي، جڏهن ته انسپيڪشن ۾ اضافو ڪيو آهي ته جيئن صفائيءَ جا معيار يقيني بڻايا وڃن ۽ غير معياري خوراڪ تي ڳرا ڏنڊ لڳايا پيا وڃن. هن وڌيڪ چيو ته ڪيميڪل ملاوٽ واري کير خلاف سنڌ جي سمورن علائقن ۾ ڪريڪ ڊائون جاري آهي ۽ اسان هڪ مهيني ۾ 9 هزار کان وڌيڪ دڪانن جو معائنو ڪيو آهي. فوڊ بزنس ڪندڙ سڀني ماڻهن تي زور ڏنو ويو آهي ته اهي سنڌ فوڊ اٿارٽي کان لائسنس حاصل ڪن. اٿارٽي هن مهيني 5 هزار کان وڌيڪ لائسنس جاري ڪيا آهن. ڊائريڪٽر جنرل وڌيڪ چيو ته سنڌ فوڊ اٿارٽي جي ملاوٽ تي زيرو ٽالنرنس آهي ۽ مدي خارج خوراڪ جي وڪري کي ڪنهن صورت برداشت نه ڪيو ويندو، ڳرا ڏنڊ لڳايا پيا وڃن.