چوري جي وارداتن ۾ ملوث ٽن عورتن سميت 5 جوابدارن کي گرفتار ڪري ورتو آهي: پوليس
حيدرآباد: حيدرآباد جي مارڪيٽ پوليس چوري جي وارداتن ۾ ملوث ٽن عورتن سميت 5 جوابدارن کي گرفتار ڪري ورتو آهي. گرفتار ڪيل عورتن ۾ مسمات ريما، مسمات راڻي ۽ مسمات فائزه شامل آهن. پوليس جو چوڻ آهي ته گرفتار ڪيل عورتون فقيرياڻين جي روپ ۾ سول اسپتال ۽ ٻين هنڌن تان چوري جي واقعن ۾ ملوث آهن. پوليس مطابق جن ٻين جوابدارن کي گرفتار ڪيو ويو انهن ۾ شهريار شيخ ۽ رضوان به شامل آهن. پوليس ڄاڻايو آهي ته گرفتار عورتن سول اسپتال جي ٻاهران هڪ شهري عبدالله هاليپوٽو ۽ ان جي زال جو موبائيل فون چوري ڪرڻ جو اعتراف ڪيو آهي. عورتن جي ٻين ساٿين جي گرفتاري لاءِ ڪوشش ڪئي پئي وڃي. جن مرد ڏوهارين کي گرفتار ڪيو ويو آهي تن وٽان پوليس هڪ پسٽل ۽ گوليون هٿ آيون آهن. انهن جوابدارن جو تعلق اسٽريٽ ڪرمنلز سان ٻڌايو پيو وڃي. مارڪيٽ پوليس مطابق جوابدارن وٽان هٿ آيل موبائيل فونز جي مالڪن جي حوالي ڪيا ويا آهن.
0 تبصرے