ٽنڊو آدم: روھڙي ڪئنال جي گھاري متاثرن جي لاءِ طبي ڪيمپ لڳائي وئي آھي: ڊاڪٽر سيد فضل حسين شاهه

ٽنڊو آدم: روھڙي ڪئنال جي گھاري متاثرن جي لاءِ طبي ڪيمپ لڳائي وئي آھي: ڊاڪٽر سيد فضل حسين شاهه

ٽنڊوآدم (حسنين عاشق ساند) تعلقه اسپتال ٽنڊوآدم جي ميڊيڪل سپرنٽينڊنٽ ڊاڪٽر سيد فضل حسين شاهه چيو آهي ته روهڙي ڪئنال ۾ گهاري بعد متاثرن کي طبي سهولتون فراهم ڪرڻ لاءِ قائم ڪيل ميڊيڪل ڪيمپ تي اسان جا ڊاڪٽر، ليڊي ڊاڪٽر، ايمبولينس سروس، ويڪسينيٽرز ۽ ليڊي هيلٿ ورڪرز هروقت موجود آهن. عورتن ۽ ٻارن سميت سمورن متاثرن جي سار سنڀال ڪئي پئي وڃي ۽ مليريا سميت سموريون ٽيسٽون ۽ دوائون مفت فراهم ڪيون پيون وڃن، اسان جي پوري ڪوشش آهي ته متاثرن کي وڌ کان وڌ سهولتون فراهم ڪيون وڃن. هن چيو ته جڙيو ڏيرو ۽ سوئي ڪندر سميت پبلڪ اسڪول ۾ قائم ڪئمپ ۾ هر وقت طبي سهولتون فراهم ڪيون پيون وڃن جڏهن ته ضرورت موجب ٻين متاثر علائقن ۾ عارضي ڪئمپون قائم ڪيون پيون وڃن، هن چيو ته دوائن سمیت ڪنهن به سامان جي ڪا به کوٽ ناهي اسان جي اسپتال ۾ 6 مرد ۽ 14 عورت ڊاڪٽر موجود آهن، سڀ ڊاڪٽر ايمانداري سان پنهنجيون ڊيوٽيون سرانجام ڏئي رهيا آهن. اسپتال ۾ 40 سالن کان آپريشن سميت مختلف سرجري ۾ استعمال ٿيندڙ اوزارن کي تبديل نه ڪرڻ ۽ ان کي بهتر انداز ۾ نه ڌوئڻ جي سوال تي هن چيو ته اسپتال ۾ آپريشن ۾ استعمال ٿيندڙ سمورو سامان اسپتال ۾ سٺي نموني ڌوتو وڃي ٿو ۽ ضرورت مطابق اهو تبديل به ڪيو ويندو آهي. هن چيو ته ٻوڏ متاثرن سميت سمورن مريضن کي بهترين سروس فراهم ڪرڻ جي هر ممڪن ڪوشش ڪئي پئي وڃي.