ظفر محمود سنڌو درياھ جو دشمن ۽ ڪالاباغ ڊيم جو حامي آھي: اياز لطيف پليجو

ظفر محمود سنڌو درياھ جو دشمن ۽ ڪالاباغ ڊيم جو حامي آھي: اياز لطيف پليجو

حيدرآباد(بيورو) قومي عوامي تحريڪ جي سربراھ اياز لطيف پليجي واپڊا جي اڳوڻي چيئرمين ظفر محمود جي ارسا چيئرمين طور مقرري کي رد ڪندي چيو آھي تہ ظفر محمود سنڌو درياھ جو دشمن ۽ ڪالاباغ ڊيم جو حامي آھي. ھن بطور واپڊا چيئرمين ڪالاباغ ڊيم جي حمايت ۾ درجنين مضمون لکيا، جيڪي اڄ بہ رڪارڊ تي آھن. ڪالاباغ ڊيم منصوبو ملڪ دشمن ۽ سنڌ دشمن منصوبو آھي، جنھن کي ملڪ جون 3 اسيمبليون رد ڪري چڪيون آھن. پيپلز پارٽي ۽ ن ليگ جي گڏيل حڪومت نگران حڪومت جي غير قانوني قدمن کي جاري نہ رکي. نگران حڪومت ارسا ايڪٽ ۾ غير قانوني ترميم ڪري صوبن کان چيئرمين شپ جو حق کسيو ھو. ان کي بنياد بنائي جيڪي سنڌ دشمن فيصلا مڙهيا ويندا، انھن کي ھرگز قبول نہ ڪيو ويندو. سنڌ دشمن فيصلا ملڪ لاءِ ڊيٿ وارنٽ ثابت ٿي سگھن ٿا. سنڌ حڪومت اقتدار لاءِ مصلھتن خاموش نہ ويھي. سنڌ حڪومت سنڌ دشمن فيصلن تي خاموش رھي تہ سنڌ جو عوام رستن تي ايندو. ظفر محمود جي چيئرمين طور مقرري کي واپس ڪري شفاف ماڻھو کي مقرر ڪيو وڃي جيڪو سنڌ سميت سمورن صوبن سان پاڻي ۾ انصاف ڪري. اياز لطيف پليجي چيو تہ سنڌ جي پاڻي تي ڏيڍ صدي کان ڌاڙو لڳي رھيو آھي. سنڌ کي پنھنجي حصي جو پاڻي نٿو ملي. سنڌ جون لکين ايڪڙ زمينون ڀڙڀانگ ٿي ويون آھن. پاڻي تي پھريون حق پڇڙي وارن جو آھي. اھو عالمي قانون آھي. ان جي ابتڙ گريٽر ٿل ڪئنال، تونسا پنجند لنڪ ڪئنال، چشما جهلم لنڪ ڪئنال سميت ٻيا سنڌ دشمن منصوبا جوڙي سنڌ جي پاڻي تي سڄو سال ڌاڙا ھنيا وڃن ٿا. اياز لطيف پليجي چيو تہ اسان اڳ ۾ ئي چيو ھو تہ پيپلز پارٽي ٻيھر اقتدار جي لالچ ۾ سنڌ دشمن فيصلا قبول ڪيا آھن، ظفر محمود جي ارسا چيئرمين طور مقرري ان جي ڪڙي آھي. درياھ دشمن شخص جي مقرري سان سنڌ جي پاڻي تي ڌارا لڳندا. سنڌ کي پنھنجي حصي جو پاڻي نہ ملندو. سنڌ جون لکين ايڪڙ زمينون ڀڙڀانگ ڪيون وينديون. سنڌ جي ماڻھن کي اڃون مارڻ ۽ زمينون نيلام ڪرڻ لاءِ منصوبابندي ڪئي پئي وڃي. اياز لطيف پليجي چيو تہ اسين ڪنھن بہ سنڌ دشمن فيصلي کي قبول نه ڪنداسين. سنڌ جا لکين ماڻھو خاموش نہ ويهندا. سنڌ کي پنھنجي حصي جو پاڻي ڏنو وڃي. پاڻي جي سلسلي ۾ سنڌ سان ناانصافيون ۽ دشمنيون بند ڪيون وڃن.