رمضان المبارڪ دوران ھٿرادو مھانگائي تي ڪنٽرول ڪيو وڃي: اياز لطيف پليجو

رمضان المبارڪ دوران ھٿرادو مھانگائي تي ڪنٽرول ڪيو وڃي: اياز لطيف پليجو

حيدرآباد(بيورو) قومي عوامي تحريڪ جي سربراهه اياز لطيف پليجي چيو آهي تہ ھٿرادو مھانگائي تي ڪنٽرول ڪيو وڃي. رمضان شريف جي خوشين ۾ غريبن کي بہ شامل ڪيو وڃي. حڪمرانن کي مزدورن، ھارين ۽ پورھيتن جو ڪو احساس ناھي. ذخيره اندوزي ۽ پئسي جي لالچ اسان جي سماج کي اڏوھي وانگر کائي رھي آھي. انسانيت شرمسار ٿي رھي آھي. سعودي عرب، پاڙيسري ملڪ ھندستان سميت دنيا جي اڪثر ملڪن ۾ رمضان شريف ايندي ئي شيون سستيون ڪيون وينديون آھن پر افسوس آھي جو اسان وٽ ان جي ابتڙ ناجائز اگھ وڌائي غريب ماڻھن لاءِ خوشيون ملھائڻ ۽ زندگي جو گاڏو ھلائڻ ناممڪن ڪيو ويندو آھي. اھو سلسلو انتھائي غير مھذب ۽ انسان دشمن آھي. اياز لطيف پليجي چيو تہ سنڌ وٽ قدرت ماء جي ھر نعمت آھي. ائين ٻيا صوبا بہ زرعي لحاظ سان بھتر آھن. باوجود ان جي اٽو، چانور، کنڊ سميت کاڌي پيتي جي ھر شئي مھانگي آھي. پيٽرول جون قيمتون آسمان کي پھتل آھن، بجلي ۽ گئس مھانگي آھي. ڪرپٽ حڪومتي سرشتي ۾ زندگي مھانگي ٿي وئي آھي. مير ماڻھو ھر شئي خريد ڪري سگھي ٿو باقي پورھيت طبقي جو ماڻھو لاءِ زندگي تنگ ڪئي وئي آھي. ڦورو ۽ استحصالي معاشي نظام پورھيت طبقي کي لٽي رھيو آھي. آئي ايم ايف جي ھدايتن تي جوڙيل معاشي نظام ملڪ جي پاڙن کي ڪمزور ڪري رھيو آھي. ملڪ تيزي سان بند گلي ڏانھن وڌي رھيو آھي. حڪمران لاتعلق آھن. ان جا نيٺ تہ ڀيانڪ نتيجا نڪرندا. اياز لطيف پليجي چيو تہ سنڌ ۾ لاقانونيت جو نظام آھي. ڪنھن بہ ماڻھو جي زندگي محفوظ ناھي. ماڻھو اغوا ٿي رھيا آھن.