سنڌ جي هر ضلعي کي جديد اسپتال ۽ وڏي يونيورسٽي جي ضرورت آهي: اياز لطيف پليجو

سنڌ جي هر ضلعي کي جديد اسپتال ۽ وڏي يونيورسٽي جي ضرورت آهي: اياز لطيف پليجو

حيدرآباد /مورو / سڪرنڊ (رپورٽرن وٽان) قومي عوامي تحريڪ جي سربراھ اياز لطيف پليجو مورو، سڪرنڊ شھر پھچڻ تي قومي عوامي تحريڪ جي ڪارڪنن، شھرين، واپارين گلن جي ورکا ڪري شاندار استقبال ڪيو ۽ کيس اجرڪن، لونگين ۽ سنڌي ٽوپين جا تعفا ڏنا. ان موقعي تي مختلف تقريبن کي خطاب ڪندي اياز لطيف پليجي چيو تہ جديد علم ۽ ٽيڪنالاجي کان سواءِ اڳيان نہ ٿو وڌي سگهجي استادن ۽ ڊاڪٽرن کي جديد تحقيق ڏانهن ڌيان ڏيڻو پوندوڏسڻو پوندو تہ ڇا سنڌ جون يونيورسٽيون جديد دنيا سان هم آهنگ آهن. سنڌ جي هر ضلعي کي جديد اسپتال ۽ وڏي يونيورسٽي جي ضرورت آهي.اياز لطيف پليجي چيو تہ اسان جو تعليمي نصاب جديد، انسان دوست ۽ سائنسي هجڻ گهرجي، شاگرد مايوسي واري خيالي دنيا مان نڪري حقيقي سائنسي دنيا ۾ اچن. شاگرد ملڪ ۾ تعليم، امن ۽ صحت لاءِ ڪردار ادا ڪن. سنڌ جي تعليم، صحت ۽ گورننس تباھ ٿي چڪي آهي نوجوان ملڪ ۾ ڪرپشن ۽ جهالت جو رستو روڪين. اياز لطيف پليجي چيو تہ سنڌ جي نگران حڪومت غير جانبدار ناهي، اهو گذريل حڪومت جو تسلسل آهي. سنڌي ماڻهو تبديلي جي ڳالھ تہ تمام سٺي ڪندا آھن مگر جڏھن تبديلي اچڻ واري اليڪشن جو ٽائيم ايندو آھي تہ پوء پاڻ سنڌ جي ھمدردن ھڏ ڏوکين کي ووٽ ڏيڻ بجاء ڪرپٽ، چور، ڀوتارن ۽ سنڌ جا وسيلا وڪڻندڙ پيپلزپارٽي، زرداري ٽولي کي ووٽ ڏئي سوڀارو ڪري ايوانن تائين پھچائيندا آھيون پوءِ واري پنج سال رڙيون دانھون ڪندا آھيون ظالم حڪمرانن مھانگائي ڪري، بدامني جي ڪري اسان جو جيئڻ جنجال بڻائي ڇڏيو آھي. جيڪو اليڪشن ۾ غلط ووٽ ڏئي ٿو اهو پنهنجي تباهيءَ جو کڏو پاڻ کوٽي ٿو، سنڌ جو عوام ڪيترن ئي ڏهاڪن کان پنهنجا حقيقي نمائندا چونڊي نہ سگهيو آهي حيرت جي ڳالھ آهي تہ سنڌ جي سمورن ڪرپٽ اميدوارن جا فارم قبول ڪيا ويا.اياز لطيف پليجي چيو تہ پاڪستان جي مسئلن جو حل روشن خيالي، احتساب ۽ غيرجانبدار پرڏيهي پاليسيءَ ۾ آهي سنڌ جي ترقي لاءِ تعصب ۽ ڪرپشن جو خاتمو ڪرڻو پوندو اقليتن ۽ عورتن جي تحفظ ۽ برابري ذريعي پاڪستان کي ڪامياب بڻائڻو آهي سنڌ کي سرداري قبيلائي نظام ۽ وڏيرا شاهي کان نجات ڏيارڻي آهي، سنڌ جي ضلعن ۾ گندو پاڻي ۽ نيڪال جو نظام بهتر ڪيو وڃي. اياز لطيف پليجي چيو تہ سنڌ جي زمينن ۽ وسيلن تي قبضا پيا ٿين، سڄي سنڌ ۾ بدامني لاقانونيت ٻيھر وڌي وئي آهي آخرڪار حڪمران ڪھڙي مرض جي دوا آھن جيڪي عوام جون تڪليفون دور ڪندا قوم جو ڪو ڌڻي سائين ڪونھي سنڌي ماڻهن کي چئلنجن کي جرئتمندي سان منھن ڏيڻو پوندو. اياز لطيف پليجي چيو تہ حڪمرانن کي عوام جي تڪليفن جي ڪا بہ پرواھ نہ آھي غريبن تي تڪليفون اچڻ سان ڄڻ ڪرپٽ حڪمرانن جي لاٽري کليو وڃي جيئن اڳ آيل برساتي ٻوڏ دوران ٻاھرين ملڪن کان ملندڙ امداد حڪمرانن اصل حقدارن تائين پھچائڻ بجاء صرف پنھنجا پيٽ ڀريا عوام اڄ بہ دربدر آھي. پيپلزپارٽي چاھي ٿي تہ افغانين برمين ۽ کي آباد ڪيون جنھن سبب ٻاھرين لوڌ ايندي رھي ٿي ۽ انھن کي آساني سان سڃاڻپ ڪارڊ بہ ٺاھي ڏنا وڃن ٿا. اياز لطيف پليجو چيو تہ سياست ۾ مستقل مزاجي سان ھلڻ جي ڪري اسين ھتي موجود آھيون ٻئي صورت ۾ اسان جو وجود ختم ٿي چڪو ھجي ھا اسان کي انتھا پسندي جي آڙ ۾ گمراھ ڪرڻ جي ڪوشش ڪئي پئي وڃي مگر اسان اھڙي گمراھ ڪندڙ انتھا پسندي کي ھميشه رد ڪيو آھي