سجاول ۾ ڊي سي ۽ ڊي آر او جي صدارت ۾ اليڪشن جي حوالي اھم گڏجاڻي

سجاول ۾ ڊي سي ۽ ڊي آر او جي صدارت ۾ اليڪشن جي حوالي اھم گڏجاڻي

سجاول(رپورٽر)ڊپٽي ڪمشنر ۽ ضلعي رٽرننگ آفيسر سجاول جي صدارت هيٺ عام چونڊن 2024ع جي تيارين جو جائزو وٺڻ بابت اهم ڊپٽي ڪمشنر ۽ ضلعي رٽرننگ آفيسر سجاول عبدالواجد شيخ چيو آهي ته اليڪشن ڪميشن کي سموريون سهولتون ۽ مدد فراهم ڪرڻ سمورن کاتن جي آئيني ۽ قانوني ذميواري ۽ اسان سڀني جو قومي فرض آهي. اهڙن خيالن جو اظهار هن سندس آفيس ۾ عام چونڊن 2024ع جي تيارين جو جائزو وٺڻ بابت هڪ اهم گڏجاڻي جي صدارت ڪندي ڪيو. گڏجاڻي ۾ ايس ايس پي شهلا قريشي، ضلعي اليڪشن ڪمشنر افتخار حسين، ايڊيشنل ڊپٽي ڪمشنر ون عبدالڪريم سنگراسي، ضلعي جي سمورن اسسٽنٽ ڪمشنرن سميت تعليم، صحت، ايجوڪيشن ورڪس، حيسڪو ۽ ٻين لاڳاپيل کاتن جي عملدارن شرڪت ڪئي. ان موقعي تي سيڪيورٽي انتظامن، پولنگ عملي جي تربيت، بجلي جي لوڊشيڊنگ کان ڇوٽ، ايمرجنسي هيلٿ پلان، پولنگ اسٽيشنن تي بنيادي سهولتن جي فراهمي، ٽرانسپورٽ سميت چونڊ عمل ۽ ٻين انتظامي معاملن جو جائزو ورتو ويو. ان موقعي تي ڊپٽي ڪمشنر ۽ ضلعي رٽرننگ عبدالواجد شيخ ايجوڪيشن ورڪس کاتي ۽ ٻين لاڳاپيل عملدارن کي سختي سان هدايت ڪئي ته سمورين پولنگ اسٽيشنن ۾ پيئڻ جو پاڻي، بجلي، واش رومز، فرنيچر، ريمپ ۽ ٻيون سمورين گهربل سهولتن جي موجودگي سميت پولنگ اسٽيشنن جي مرمت ۽ بحالي ۽ ٻين انتظامن کي هر صورت ۾ 15 جنوري کان اڳ يقيني بڻايو وڃي ته جيئن پولنگ اسٽيشنن جي حتمي لسٽ اعليٰ اختيارين کي موڪلي سگهجي، ان سلسلي ۾ ڪنهن به قسم جي ڪوتاهي برداشت نه ڪئي ويندي. هُن پوليس عملدارن کي هدايت ڪئي ته ريٽرننگ آفيسرن جي آفيسن سميت سمورين پولنگ اسٽيشنن جي سڪيورٽي لاءِ فول پروف پلان تيار ڪيو وڃي ته جيئن ڪو به امڪاني اڻوڻندڙ واقعو پيش نه اچي ۽ چونڊ عمل پرامن طريقي سان مڪمل ٿي سگهي. هن چيو ته ضلعي انتظاميه پاران اليڪشن جي حوالي سان سموريون سهولتون فراهم ڪيون وينديون. ان کان اڳ ضلعي اليڪشن ڪمشنر افتخار حسين چيو ته مرد ۽ عورت پرزائيڊنگ ۽ اسسٽنٽ پرزائيڊنگ آفيسرن کي چونڊن جي حوالي سان تربيت ڏني ويندي ته جيئن اليڪشن واري ڏينهن پولنگ جو عمل بهتر طريقي سان سرانجام ڏئي سگهجي. هن چيو ته سمورن کاتن جا آفيسر پنهنجي لاڳاپيل عملي کي تربيت دوران شرڪت لاءِ پابند بڻائين.