معذور ماڻهو نه رڳو اسان جا شهري پر اسان جو قيمتي اثاثو آهن: نگران وڏو وزير

معذور ماڻهو نه رڳو اسان جا شهري پر اسان جو قيمتي اثاثو آهن: نگران وڏو وزير

ڪراچي (رپورٽر) سنڌ جي نگران وڏي وزير جسٽس (ر) مقبول باقر جي صدارت هيٺ وزيراعليٰ سيڪريٽريٽ ۾ ويل چيئر ڪرڪيٽ ٽيم جي اعزاز ۾ تقريب ڪوٺائي وئي جنهن ۾ سيڪريٽري ڊي اي پي ڊي طحه فاروقي، سينيٽر ڪشور زهرا ۽ ٻين اعليٰ عملدارن شرڪت ڪئي. وڏي وزير ايشيا ڪپ کٽڻ تي ويل چيئر ڪرڪيٽ ٽيم جي هر هڪ ميمبر کي هڪ لک رپيا انعام ڏيڻ ۽ کين اعزازي ميڊل پڻ ڏيڻ اعلان ڪيو. تقريب کي خطاب ڪندي وڏي وزير ايشيا ڪپ کٽڻ واري ويل چيئر ڪرڪيٽ ٽيم کي مبارڪباد ڏيندي چيو ته جرئتمند ڪاميابيون نه رڳو پختي عزم پر پاڻ جي بااعتمادي جي قدرن کي پڻ اجاڳر ڪن ٿيون، آئون سمجهان ٿو ته توهان جي صلاحيتن کي ڪيترن ئي چئلينجن جي باوجود ميچ کٽيو هوندو. وڏي وزير چيو ته هن فتح توهان لاءِ خصوصي فرد Differently Abled Persons لفظ کي حقيقت بڻائي ڇڏيو آهي. وڏي وزير چيو ته معذور ماڻهو نه رڳو اسان جا شهري پر اسان جو قيمتي اثاثو آهن، اچو ته گڏجي عهد ڪريون ته ”معذور سڃاڻپ“ واري پراڻي روايتي روايت کي تبديل ڪريون. هن چيو ته اسان کي معذور ماڻهن کي سماج جي مرڪزي ڌارا ۾ شامل ڪرڻ گهرجي، سنڌ پرسنز ڊس ايبلٽيز ايڪٽ 2018ع کي ان جي اصل روح موجب لاڳو ڪرڻ جي ڀرپور ڪوشش ڪنداسين. هن چيو ته سنڌ حڪومت هر فرد کي برابري جا موقعا، پهچ، اهميت، روزگار ۽ قابليت کانسواءِ عزت ڏيڻ چاهي ٿي ۽ معذورن جو کاتو (DEPD) ڀرپور خدمت ڪري رهيو آهي. وڏي وزير چيو ته سنڌ حڪومت گرانٽ جي صورت ۾ سماج ۾ بهتري آڻڻ وارن جي مدد ڪري ٿي، اچو ته اهڙو معاشرو جوڙيون جتي هر فرد پاڻ کي بااختيار محسوس ڪري. تقريب کي خطاب ڪندي سيڪريٽري ڊي اي پي ڊي طحه فاروقي چيو ته سنڌ حڪومت اسپيشل ٻارن لاءِ ڪيتريون ئي اسڪيمون شروع ڪيون آهن ۽ گلستان جوهر سينٽر ۾ جم سينٽر قائم ڪري رهي آهي. آخر ۾ وڏي وزير ايشيا ڪپ کٽيندڙ ويل چيئر ڪرڪيٽ ٽيم جي رانديگرن ۾ هڪ هڪ لک جا چيڪ ۽ ميڊل ورهايا.