اياز لطيف پليجي قاسم آباد جي پي ايس 60 تي نامزدگي فارم جمع ڪرائي ڇڏيو

115 views | 21st Dec 2023 • سنڌي خبرون

اياز لطيف پليجي قاسم آباد جي پي ايس 60 تي نامزدگي فارم جمع ڪرائي ڇڏيو

حيدرآباد(بيورو) قومي عوامي تحريڪ جي سربراھ اياز لطيف پليجي قاسم آباد جي صوبائي تڪ پي ايس 60 جي ريٽرننگ آفيسر وٽ نامزدگي فارم جمع ڪرائي ڇڏيو. اسڪروٽني 25 ڊسمبر تي ٿيندي. فارم جمع ڪرائڻ کانپوءِ ميڊيا سان ڳالهائيندي اياز لطيف پليجي چيو تہ 2013 ۽ 2018 ۾ بدترين ڌانڌليون ڪري پيپلز پارٽي کي اقتدار پليٽ ۾ رکي ڏنو ويو. شفاف چونڊون نہ ٿيڻ ڪري ھر ڀيري عوام دشمن ماڻھو اقتدار تي مسلط ٿي سنڌ ۽ ملڪ جا وسيلا لٽيندا رھيا آھن. ھن ڀيري شفاف چونڊون ٿيون تہ عوام ڪرپٽ زرداري ليگ کي رد ڪري ڇڏيندو. ايندڙ حڪومت جي ڊي اي ٺاھيندي. اليڪشن ۾ ڪامياب ٿي سنڌ جي عوام جي ترجماني ڪنداسين ۽ مسئلا حل ڪنداسين. اياز لطيف پليجي چيو تہ سنڌ جي زراعت، تعليم ۽ صحت کي بحرانن مان ڪڍنداسين. سنڌ کي ميرٽ ذريعي تبديل ڪنداسين. خوشحالي ۽ ترقي جي دور جي شروعات ڪنداسين.اياز لطيف پليجي چيو تہ سنڌ ۾ ھٿرادو ڀاڻ جي کوٽ ڪري آبادگارن کي ٻنھي ھٿن سان لٽيو پيو وڃي۔مارڪيٽ ۾ موجود ھجڻ باوجود ڊيلر ڀاڻ بليڪ تي وڪرو ڪري ھارين ۽ آبادگارن جو معاشي قتل ڪري رھيا آھن۔ سنڌ حڪومت بليڪ تي ڀاڻ ڏيندڙن جي سرپرستي ڪري رھي آھي۔ ڀاڻ جي ھٿرادو کوٽ خلاف ڪا بہ ڪارروائي نٿي ڪئي وڃي۔ اياز لطيف پليجي چيو تہ حڪمرانن سنڌ جي زراعت کي تباھي ڪناري پھچائي ڇڏيو آھي۔ جڏھن فصل لھن ٿا تہ انھن جا اگھ ڪيرايا وڃن ٿا۔ آبادگارن ۽ ھارين کي پنھنجي محنت جو اجورو بہ نٿو ملي۔ ھر زرعي فصل پوکڻ مھانگو ٿي ويو آھي۔ نقلي ٻج ۽ ڀاڻ بہ وڏو نقصان ڏئي رھيو آھي۔ پاڻي جي کوٽ جي ڪري فصل تباھ ٿي ويا آھن۔ اياز لطيف پليجي چيو تہ پاڻي تي حڪومتي ماڻھن، وڏيرن سردارن جو قبضو آھي. اھي مخالفن، ننڍن آبادگارن ۽ پڇڙي تائين پاڻي پھچڻ نٿا ڏين، جنھن ڪري آباد زمينون ڀڙڀانگ ٿي ويون آھن۔ اياز لطيف پليجي چيو تہ نقلي ٻج، نقلي دوائن ۽ ڀاڻ جو وڏو ڪاروبار وڌي ويو آھي۔ رشوت جي ڪري جعلسازي ڪندڙن خلاف ڪا بہ ڪارروائي نٿي ڪئي وڃي۔ اياز لطيف پليجي چيو تہ ڪمند جي آبادگارن کي گذريل سالن جون رھيل بقايائون نٿيون ڏنيون وڃن۔ ڪڻڪ لھي ٿي تہ باردانو گم ڪيو وڃي ٿو۔ سارين، ڦٽين ۽ ٻين فصلن جا اگھ ڪيرائي آبادگارن ۽ ھارين کي ڪنگال ڪيو ويو، اھا زراعت جي تباھي آھي، جنھن ڪري غربت وڌي وئي آھي۔ بدحالي سبب سنڌ ترقي بدران پوئتي وڃي رھي آھي۔ اياز لطيف پليجي چيو تہ ڀاڻ جي ھٿرادو کوٽ ختم ڪئي وڃي ۽ ملوث ماڻھن خلاف سخت ڪارروائي ڪئي وڃي۔