سنڌڙي جي بوائز ھاءِ اسڪول دين محمد ناريجو ۾ ثقافتي تقريب منعقد

سنڌڙي جي بوائز ھاءِ اسڪول دين محمد ناريجو ۾ ثقافتي تقريب منعقد

ميرپورخاص (بيورو رپورٽ) تعلقي سنڌڙي جي گورنمينٽ بوائز ھاء اسڪول دين محمد ناريجو ۾ ثقافتي رنگ نکري پيا، ان سلسلي ۾ ھڪ ثقافتي تقريب منعقد ڪئي ويئي، تقريب ۾ شاگردن ثقافتي ويس سنڌي ٽوپي اجرڪ اوڍي ، گھوٽ ۽ ڪنوار وارو ناٽڪ ادا ڪري سنڌي گانن تي رقص ڪرڻ ۽ سنڌي گيت ڳائڻ سميت تقريرون ۽ مختلف ٽيبلوز پيش ڪري آيل مھمانن کان داد وصول ڪيون، تقريب ۾ مھمان خاص تعلقه ايجوڪيشن آفيسر مصطفي جمال پنھور صاحب ، مقامي اڳواڻن يامين ناريجو، امداد ناريجو ، يوسي چٽوڙي جو چيئرمين علي اڪبر ناريجو ، وائس چيئرمين جان علي جوڻيجو، اڳوڻو ھيڊ ماستر جميل لاشاري ، سماجي اڳواڻ ذوالفقار ڀٽو شر شرڪت ڪئي جن کي اسڪول جي ھيڊ ماستر محمد سليم جتوئي ٻين استاد پاران آڌرڀاء ڪري کين سنڌ جي روايت موجب اجرڪون پيش ڪيون، تقريب ۾ آيل مھمانن خطاب ڪندي چيو ته سنڌ جي ثقافت قديم آھي، ۽ سنڌي ٽوپي اجرڪ ئي سنڌين جي سڃاڻپ آھي ، اسڪولن ۾ اھڙا ثقافتي پروگرام ٿيڻ ھڪ بھترين سرگرمي آھي ۽ اھڙا ثقافتي پروگرام ٿيڻ گھرجن ته جئين شاگردن ۾ سنڌ جي تھذيب ۽ ثقافت کي اجاگر ڪري سگھجي، ۽ شاگردن ۾ اھڙو ٽيلنٽ ڏسي تمام گھڻي خوشي ٿي، شاگردن جي ٽيلنٽ کي ظاھر ڪرڻ ۾ استادن جو اھم ڪردار آھي ، سنڌ جي تعليم ۾ بھتري اچي رھي آھي يقينن ھاڻي بھترين استاد اچي ويا آھن ۽ سنڌ جو مستقبل ھاڻي انھن بھترين استادن جي ھٿن ۾ آھي، جڏھن ته تقريب ۾ اسٽيج جا فرائض استاد روي شنڪر مالھي سرانجام ڏنا.