گذريل حڪومت ٻوڏ متاثرن جي بحالي بدران امداد جي نالي ۾ اربين روپين جي ڪرپشن ڪئي: اياز لطيف پليجو

گذريل حڪومت ٻوڏ متاثرن جي بحالي بدران امداد جي نالي ۾ اربين روپين جي ڪرپشن ڪئي: اياز لطيف پليجو

حيدرآباد(بيورو) قومي عوامي تحريڪ جي سربراھ اياز لطيف پليجي چيو آهي تہ پيپلزپارٽي جي گذريل حڪومت ٻوڏ متاثرن جي بحالي بدران امداد جي نالي ۾ اربين روپين جي ڪرپشن ڪئي. ٻوڏ سبب سنڌ جا ماڻھو معاشي طور پٺتي پئجي ويا آھن. ٻوڏ سبب لکين متاثرن جا گھر ڊھي ويا. مال مري ويو ۽ فصل ٻڏي ويا. پ پ حڪومت ان متاثرن جي بحالي نہ ڪري سگھي آھي. ڊجيٽل آدمشماري ۾ انھن متاثرن جي ڳڻپ نہ ٿي سگھي. لکين ٻوڏ متاثرن کي ڪراچي ۾ آباد ڪيو وڃي ھا تہ اھي معاشي طور پيرن تي بيھي وڃن ھا.اياز لطيف پليجي چيو تہ پيپلز پارٽي پنھنجي سياسي مفادن لاءِ عالمي امدادي ادارن کي واھر کان روڪيو ۽ متاثرن جي بحالي بدران ماڻھن کي فقير بنايو. اياز لطيف پليجي چيو تہ خراب حڪمراني ۽ ڪرپشن جي ڪري سنڌ ترقي ۾ باقي صوبن کان پوئتي رھجي وئي آھي. قبيلائي جھيڙا ۽ بدامني ناسور بنجي ويا آھن. جيڪي ماڻھو اغوا ٿين ٿا اھي ڀنگ ڀري بازياب ٿين ٿا. اياز لطيف پليجي چيو تہ حڪومتي وڏيرا ڏوھارين جا سرپرست بنيل آھن. منشيات جو زھر نوجوانن ۽ ٻارن کي تباھ ڪري رھيو آھي. سنڌ جا ماڻھو امداد جي آسري بدران پنھنجي پيرن تي بيھن، نوجوان ھنر سکن ۽ ڪراچي سميت وڏن شھرن ۾ اچي ڪاروبار ڪن. اياز لطيف پليجي چيو تہ دنيا محنت ۽ ميرٽ وارن جي آھي. پ پ چاھي تہ ٿي ماڻھو سوال نه ڪن. محنت ۽ تعليم کان پري ھجن ۽ ووٽ ڏيڻ جي مشين ھجن. اھي فقير ھجن، خيرات جي آسري بنگلن جي اڳيان گھمندا رھن. اياز لطيف پليجي چيو تہ مھانگائي اڃا وڌندي. حڪمرانن جون معاشي پاليسيون عوام دوست ناھن. ايندر اليڪشن ۾ ڪرپٽ ماڻھن کي رد ڪيو وڃي.