ٺٽي ۾ اي ڊي سي ون پاران ھاءِ اسڪول، ھيلٿ سينٽر ۽ واٽر سپلائي اسڪيم جو دورو

ٺٽي ۾ اي ڊي سي ون پاران ھاءِ اسڪول، ھيلٿ سينٽر ۽ واٽر سپلائي اسڪيم جو دورو

ٺٽو( ڊر) ايڊيشنل ڊپٽي ڪمشنر ون ٺٽو جو گورنمينٽ بوائز ھاء اسڪول ، رورل ھيلٿ سينٽر ۽ واٽر سپلائي اسڪيم جو اوچتو دورو ، سموري صورتحال جو جائزو - ايڊيشنل ڊپٽي ڪمشنر ون محمد علي خواجه لاڳاپيل عملدارن کي سختي سان هدايت ڪئي آهي ته هو عوام کي بهتر طبي سهولتن، معياري تعليم ۽ پيئڻ جي صاف پاڻي جي فراهمي لاءِ پنهنجو ڀرپور ڪردار ادا ڪن تہ جيئن عوام کي بنيادي سھولتن جي فراهمي کي يقيني بڻائي سگهجي. اھڙيون هدايتون ھُن گورنمينٽ بوائز هاءِ اسڪول، ڳوٺاڻو صحت مرڪز ۽ واٽر سپلاءِ اسڪيم جبگشاھي جي دوري دوران ڏنيون. هُن چيو ته استادن ۽ ٻين ملازمن جي حاضري، صفائي سٿرائي، ڊاڪٽرن، عملي ۽ دوائن جي موجودگي سميت سمورين شهري سهولتن کي يقيني بڻايو وڃي. هُن هاءِ اسڪول ۾ مقرر ۽ موجود استادن جي تعداد، شاگردن جي داخلا ۽ حاضري، واش رومز، بجلي ۽ فرنيچر جي صورتحال جو جائزو ورتو جڏهن ته ڳوٺاڻي صحت مرڪز ۾ ڊاڪٽرن ۽ پيرا ميڊيڪل اسٽاف، صفائي سٿرائي، بسترن، الٽراسائونڊ، ايڪسري، ليبارٽري، دوائن جي موجودگي ۽ ٻين سهولتن ۽ عمارت جو معائنو ڪيو ۽ تفصيل پڻ ورتا. ايڊيشنل ڊپٽي ڪمشنر ون محمد علي خواجه واٽر سپلاءِ اسڪيم جي غير فعال ھئڻ ۽ ملازمن جي غير حاضري تي ڪاوڙ جو اظهار ڪندي اعليٰ اختيارين کي رپورٽ موڪلڻ جو حڪم ڏنو ته جيئن واٽر سپلاءِ اسڪيم کي جلد کان جلد فعال ڪري عوام کي پيئڻ جي پاڻي جي فراهمي کي يقيني بڻائي سگهجي.