ڊي سي شھيد بينظير آباد جو اين ڊي ايف ذھني معذوري جي بحالي مرڪز جو دورو

فزيوٿراپي، نفسياتي علاج، اسپيچ ٿراپي، آڪوپيشنل ٿراپي ۽ غير رسمي تعليم بابت آگاهه ڪيو ويو

نواب شاھ (رپورٽر) ڊپٽي ڪمشنر شھيد بينظير آباد زاھد حسين رند اين ڊي ايف جي ذھني معذوري جي بحالي مرڪز نواب شاه جو دورو ڪيو. ان موقعي تي زاھد حسين رند اين ڊي ايف جي ڪوششن کي ساراهيندي چيو ته اين ڊي ايف ادارو نوابشاھ جي ٻارن جي بحاليءَ جون خدمتون گهرن جي ويجھو مھيا ڪري وڏي خدمت جو مظاهرو ڪيو آهي. هن اين ڊي ايف بحالي مرڪز کي نواب شاه جي ٻارن لاءِ خدا جو ڏنل تحفو قرار ڏنو. هن نوابشاه ۾ بحالي مرڪز جي استحڪام لاءِ پنهنجي هر ممڪن سهڪار جو يقين ڏياريو. ان کان اڳ عابد لاشاري صدر NDF، طارق حسين چنڙ پروگرام مئنيجر، سائره لاشاري ڊائريڪٽر NDF بحالي مرڪز نوابشاه نوابشاه جي مرڪز ۾ ملندڙ مفت بحالي خدمتون جهڙوڪ فزيوٿراپي، نفسياتي علاج، اسپيچ ٿراپي، آڪوپيشنل ٿراپي ۽ غير رسمي تعليم بابت آگاهه ڪيو. وڌيڪ ٻڌايو تہ اها سهولت 100 ٻارن لاءِ آهي جيڪا ڊي اي پي ڊي گورنمينٽ آف سنڌ ۽ ٻين ادارن جي سھڪار سان ممڪن ٿي آهي. ان موقعي تي عابد لاشاري حڪومت ۽ ٻين واسطيدار ادارن تي زور ڀريو ته هو سنڌ جي ڏورانهن علائقن ۾ مذڪورہ خدمتن کي جاري رکڻ ۽ ان کي وڌائڻ لاءِ ممڪن مدد فراهم ڪئي وڃي. ڊپٽي ڪمشنر ٻارڙن ۾ ڪپڙا ۽ جوتا پڻ ورھايا.