جماعت اسلامي سنڌ پاران پيٽرول اگهن ۾ گهٽتائي جو فائدو عوام کي پهچائڻ جو مطالبو

ڊالر ۽ پيٽرول جي اگهن ۾ گهٽتائي باوجود روزاني استعمال وارين شين ۽ ٽرانسپورٽ ڀاڙن ۾ گهٽتائي کان عوام محروم آهي: محمد حسين محنتي

ڪراچي (اسٽاف رپورٽر) امير جماعت اسلامي سنڌ ۽ اڳوڻي ايم اين اي محمد حسين محنتي پيٽرول ۽ ڊالر جي اگهن ۾ گهٽتائي جو فائدو ٽرانسپورٽ ڀاڙن، اٽي، دال، کنڊ سميت عام واهپي وارين شين جي اگهن ۾ گهٽتائي ڪري عوام کي حقيقي فائدو پهچائڻ جو مطالبو ڪندي چيو آهي ته ڊالر 335 کان 275 ۽ پيٽرول 333 کان 283 رپين تي پهچڻ کان پوءِ هٿراڌو مهانگائي، ناجائز منافعي خوري ۽ ذخيره اندوزي ڪرڻ وارن واپارين ۽ دڪاندارن خلاف ڪاروائي ڪري پرائس ڪنٽرول ڪميٽين کي فعال بڻايو وڃي. هن اڄ هڪ بيان ۾ وڌيڪ چيو ته مهانگائي جي ڪري اڄ هر فرد پريشان آهي، مهانگائي عالمي مسئلو واري ڳالهه کي تسليم ڪجي تڏهن به پاڪستان ۾ هٿراڌو مهانگائي ۽ پنهنجي پسند جا اگهه مقرر ڪري روزاني واهپي وارين شين جي اگهن ۾ اضافو ڪيو ٿو وڃي، هاڻي جڏهن ڊالر ۽ پيٽرول 50 رپين تائين گهٽ ٿي چڪو آهي ته ان جو فائدو عوام کي پهچايو وڃي، حڪومت جي ذميواري آهي ته حڪومتي رٽ کي قائم ۽ اگهن کي ڪنٽرول ڪرڻ لاءِ جوڳا انتظام ڪري عوام کي ريليف فراهم ڪيو وڃي. روزاني استعمال وارين شين ۽ ٽرانسپورٽ جي ڀاڙن ۾ ڪمي نه هئڻ جي ڪري عوام حقيقي رليف کان محروم آهي، وفاقي ۽ صوبائي حڪومتن کي گهرجي ته عوام کي فائدو پهچائڻ لاءِ عالمي مارڪيٽ ۾ تيل قيمتن ۾ گهٽتائي جو فائدو عوام کي پهچائي ته جئين مهانگائي، بيروزگاري کان تنگ عوام سُک جو ساهه کڻي سگهي.#