جنگشاهي جي ٻن اڳوڻن ڪائونسلرن ۽ بااثر شخصيتن جا گرفتاري وارنٽ جاري

عدالت اڳوڻن ڪائونسلرن محمد زمان بروھي ۽ منور نواز بروھي جا گرفتاري وارنٽ جاري ڪري ڇڏيا

ٺٽو( شفيق ڀٽي) جنگشاهي جي ٻن اڳوڻن ڪائونسلرن ۽ بااثر سياسي شخصيتن جا ٺٽي جي عدالت آر او پلانٽن جون سولر پليٽون چوري ٿيڻ واري ڪيس ۾ گرفتاري وارنٽ جاري ڪري ڇڏيا آھن، ٺٽي جي فرسٽ سول جج ۽ جوڊيشل مئجسٽريٽ شھباز احمد شيخ جي عدالت جنگشاهي لڳ ڳوٺ سبز علي بروهي جي آر او پلانٽ مان هڪ سئو کان مٿي سولر پليٽون چوري ڪرڻ واري ڪيس جي ٻڌڻي ڪئي، جنھن ۾ مڪلي ٿاڻي تي داخل سولر پليٽون چوري ڪرڻ واري ايف آءِ آر ۾ نامزد ۽ فرار ٿيل ٻن جوابدار اڳوڻن ڪائونسلرن محمد زمان بروهي ۽ منور نواز بروهي جي گرفتاري جا وارنٽ جاري ڪري ڇڏيا آھن، جن ۾ اڳوڻو ڪائونسلر منور نواز بروهي يوسي ڪوهستان 7 ڀاڱي 4 جنگشاهي ۾ پيپلزپارٽي جو جنرل سيڪريٽري پڻ آھي. واضع رهي ته مڪلي پوليس ڳوٺ سبز علي بروهي ۾ ڪروڙين روپين جي لاڳت سان واٽر سپلاءِ جي اهم اسڪيم آر او پلانٽ جي 100 کان مٿي سمورين سولر پليٽن ۽ مشينري کي چوري ڪيو ويو هو، جنھن کانپوء مقامي ڳوٺاڻن جي نشاندهي تي مڪلي پوليس ڪيس داخل ڪري 5 جوابدارن کي گرفتار ڪيو هو، جيڪي هن وقت ضمانت تي آھن، ھن ڪيس ۾ نامزد 3 بااثر جوابدار منور نواز بروهي، محمد زمان بروهي ۽ گل محمد بروهي مسلسل روپوش آھن. جنگشاهي جي وڏي ڪوهستاني ڳوٺ سبز علي بروهي جي واٽر سپلاءِ اسڪيم جي آر او پلانٽ جون سموريون سولر پليٽون ۽ مشينون چوري ٿي وڃڻ ڪري ڪيترن ئي مهينن کان ڳوٺاڻن جي پيئڻ جو پاڻي بند ھجڻ ڪري علائقي واسي پيئڻ جي پاڻي لاء پريشان بڻيل آھن. جن وس وارن کان انصاف جو مطالبو ڪندي کين پيئڻ جو پاڻي مھيا ڪري جوابدارن کي گرفتار ڪري کين سخت سزائون ڏيارڻ جي گھر ڪئي آھي.