نصيرآباد ويجھو ڳوٺ ٿرڙي ھاشم جي تاريخي اسڪول مان پراڻو رڪارڊ ۽ ٻيو سامان چوري
اڻڄاتل چور رڪارڊ سميت ٻيو سامان بھ کڻي ويا آھن، اسڪول جي تاريخ جي ھٿ چراند ڪئي وئي آھي: ھيڊ ماستر حماد اللھ تنيو
وڳڻ (رپورٽر) ضلعي قمبر شهدادڪوٽ تعلقي نصيرآباد جي يوسي چئوديرو ۾ قائم قديمي ڳوٺ ٿرڙي ھاشم جي تاريخي اسڪول مان اڻڄاتل جوابدار پراڻو رڪارڊ ۽ ٻيو سامان چوري ڪري ويا آهن. تعليم دشمن عنصرن گورنمينٽ بوائز پرائمري اسڪول جي آفيس جا تالا ٽوڙي سيف ڀڃي سمورو اھم رڪارڊ جنھن ۾ 1883 کان وٺي ھلندڙ سال تائين جا چار جلد ٿيل جنرل رجسٽر۔ رزلٽ شيٽس۔ داخلا ٽوڪن سرٽيفڪيٽ۔ڊيڊ اسٽاڪ رجسٽر۔ روانگي رجسٽر۔ وزيٽرس بڪ ان وقت کان اڄ تائين سانڍيل استاد صاحبان جا مسٽرول رجسٽر ۽ ٻيو ڪيترو ئي قيمتي اثاثو شامل آھي۔جنھن ۾ انگريزن جي زماني کان وٺي پڙھندڙ ڳوٺ جي ماڻھن ۽ اڄ تائين داخل ٿيل شاگردن جو اھم رڪاڊ شامل آھي جيڪو چوري ڪيو ويو آھي. اسڪول جي هيڊ ماستر استاد حمادالله تنيو ميڊيا سان ڳالهائيندي ٻڌايو ته ٻئي سامان سميت تاريخي رڪارڊ جي چوري ڪرڻ وارو عمل تعليم دشمن عنصرن جي حاسد سوچ ۽ پڙھيل لکيل ماڻھن کي تڪليف ڏيڻ برابر آهي، آئون ڳوٺ جي ھر ذي شعور ۽ پڙھيل لکيل فرد کي اپيل ٿو ڪريان ھن ھيڏي وڏي ھاڃي جنھن ۾ اسان ۽ اسان جي اولاد جو مستقبل سمايل آھي ان اھم رڪاڊ جي واپسي لاء ھر فورم تي ڀرپور آواز اٿاريو وڃي. هن استادن جي نمائدنگي ڪندڙ تنظيم پ ٽ الف جي عهديدارن کي به گذارش ڪئي ته ھي پھريون دفعو ناھي جو اسان جي اسڪول جو نقصان ٿيو ھجي ھن کان اڳ چار مھينا پھريان اسڪول جي ڪمرن جا تالا ٽوڙي ست پکا چوري ڪيا ويا، جنھن جي اين سي وڳڻ پوليس اسٽيشن تي داخل ٿيل آھي. ان جو ازالو به ھينئر تائين نه ٿي سگھيو آھي۔ اسڪول جي هيڊ ماستر استاد حمادالله تنيو لاڳاپيل اختيارين ۽ سنڌ جي ساڃاهه وند، تعليم دوست ڌرين کي پڻ اپيل ڪئي آهي ته ھن اھم معاملي ۾ پنھنجو ڀرپور ڪردار ادا ڪري تاريخي رڪارڊ واپس ڪرائڻ ۾ سندن مدد ڪئي وڃي.
0 تبصرے