اين ڊي ايف نوابشاه پاران معذور ٻارڙن جي لاءِ ھڪ ڏينھن واري طبي ڪيمپ قائم

ڊاڪٽرن مسيحائي ڪردار ادا ڪيو، مفت چڪاس ۽ علاج ھن دور ۾ ھڪ خواب آھي: عابد لاشاري

نواب شاه(ڊ ر) سماجي تنظيم اين ڊي ايف پاڪستان پاران معذور ٻارن جي معذوري ۽ بيماري جي چڪاس ۽ تشخيص لاءِ پروفيسر ڊاڪٽر علي اڪبر سيال جي ٿورن سان ھڪ روزه ڪيمپ لڳائي وئي. ان موقعي تي 100 کان مٿي معذور ٻارڙا مستفيد ٿيا. ڪيمپ دوران معذور ٻارڙن ۾ بيمارين جي چڪاس سان گڏوگڏ معذوري جي تشخيص، شدت، سست روي ۽ ٻين روين بابت تفصيلي رپورٽ ورتي ويئي ان موقعي تي کوڙ سارا ٽيسٽ پڻ تجويز ڪيا ويا جيڪي سرڪاري اسپتالن مان مفت ڪرايا ويندا. والدين اين ڊي ايف مرڪز جا ٿورا مڃيندي چيو ته ادارو بي لوث خدمت مفت فراھم ڪري رھيو آھي ھر ٻار جي بحالي ٿي آھي اڳ کان سڌارو آيو آھي. ٻارن جي ماھر ڊاڪٽر پروفيسر ڊاڪٽر علي اڪبر سيال چيو تہ ڪيمپ لڳائڻ جو مقصد ٻارن جي جامع چڪاس ڪرڻ آھي جيئن ٻارن بابت مڪمل ڄاڻ اچي وڃي ۽ جيئن جامع علاج جي منصوبه بندي ڪئي وڃي. اين ڊي ايف ٽيم جو جذبو وڌائڻ لاءِ اسان جي ٽيم سندن ساٿ ڏنو آھي جيڪا اسان سماجي ذميواري ھئي. عابد لاشاري صدر اين ڊي ايف ڊاڪٽرن جي ٽيم جا ٿورا مڃيندي چيو ته ڊاڪٽرن مسيحائي ڪردار ادا ڪري سوين خاندانن جون دليون کٽي ورتيون. مفت چڪاس ۽ علاج ھن دور ۾ ھڪ خواب آھي. اين ڊي ايف پاڪستان پنهنجو دائرہ ڪار وڌائي لاڙڪاڻي پهتي آھي جلد ان شاءالله ٻين ڏورانهن علائقن تائين پنهنجي محدود وسائل مان خدمت جاري رکندي. اين ڊي ايف کي حوصله افزائي جي ضرورت هوندي آهي جيڪا معاشرو ھميشه ڪندو رھندو آھي.