ڊي سي ٺٽو جي صدارت هيٺ بجلي چوري روڪڻ لاءِ ضلعي انفورسمينٽ ڪميٽي جو اجلاس

هي هڪ قومي مهم آهي ان ۾ ڪوتاهي برداشت نه ڪئي ويندي: ڊپٽي ڪمشنر ٺٽو اسد علي خان

ٺٽو (ڊ ر)ڊپٽي ڪمشنر ٺٽو اسد علي خان جي صدارت هيٺ سندس آفيس ۾ بجلي چوري جي روڪٿام لاءِ ضلعي انفورسمينٽ ڪميٽي جو اجلاس منقعد ٿيو، جنهن ۾ ايس ايس پي آفتاب نظاماڻي، ايڪسين حيسڪو فريدالدين ۽ ضلعي جي سمورن اسسٽنٽ ڪمشنرن شرڪت ڪئي. اجلاس جي صدارت ڪندي ڊپٽي ڪمشنر چيو ته هي هڪ قومي مهم آهي ان ۾ ڪوتاهي برداشت نه ڪئي ويندي ڇو ته بجلي چوري جهڙي سنگين ڏوهه جو نقصان بل ادا ڪندڙ عوام کي برداشت ڪرڻو پوندو آهي. ڊپٽي ڪمشنر حيسڪو آفيسرن کي هدايت ڪئي ته هو بجلي چوري کي روڪڻ ۽ ڪنڊا ڪلچر کي ختم ڪرڻ لاءِ لاءِ جٽادار حڪمت عملي جوڙي ڪنيڪشن ڪٽيا وڃن ۽ ان حوالي سان سرڪاري ڪم ۾ مداخلت ڪندڙن خلاف سخت ڪارروائي ڪئي وڃي ته جيئن ضلعي مان بجلي چوري جو مڪمل خاتمو ڪري لوڊشيڊنگ ۾ گهٽتائي آڻي سگهجي. هن چيو ته ضلعي انتظاميه ان سلسلي ۾ هر ممڪن تعاون ڪندي. هن ضلعي جي عوام کي خبردار ڪيو آھي ته هو ڪنڊا ڪلچر ۽ بجلي چوري کان پاسو ڪن ۽ ذميوار شهري هجڻ جي حيثيت سان قانوني طريقي سان بجلي استعمال ڪن ته جيئن بجلي چوري جو خاتمو آڻي ملڪ ۽ قوم کي خوشحالي ۽ ترقي جي راهه تي گامزن ڪري سگهجي. ان موقعي تي ايس ايس پي آفتاب نظاماڻي چيو ته ضلعي پوليس بجلي چوري جي روڪٿام لاءِ ضلعي انتظاميا ۽ واپڊا اٿارٽي سان مڪمل تعاون ڪندي. ان موقعي تي ايڪسين حيسڪو فريدالدين ٻڌايو ته ضلعي ۾ هن وقت تائين بجلي چورن خلاف 3 ايف آءِ آر داخل ڪيون ويون آهن جڏهن ته بجلي چوري کي روڪڻ ۽ ڪنڊا ڪلچر جي نشاندهي ڪري مهم کي وڌيڪ تيز ڪيو پيو وڃي. هن چيو ته ضلعي ۾ بجلي جا بل ادا نه ڪندڙن کان هن وقت تائين اٽڪل ھڪ ڪروڙ 80 لک روپين جي وصولي ڪئي وئي آهي. ان موقعي تي بجلي جي ممڪنہ چوري جي روڪٿام بابت هڪ جامع پلان جوڙڻ ۽ ان حوالي سان کنيل قدمن جو تفصيلي جائزو پڻ ورتو ويو.