دڙو ۽ ٻنون جي مختلف ٻيلن مان وڏي پئماني تي ناياب وڻن جي واڍي جاري

روزانو لکين روپين جي وڻن جي واڍي ڪري ڪاٺ وڪرو ڪيو وڃي ٿو: ذريعا

سجاول(رپورٽر) دڙو ۽ ٻنون جي مختلف ٻيلن مان وڏي پئماني تي ناياب وڻن جي نسل ڪشي جاري، روزانو لکين روپين جو عمارتي ڪاٺ وڍجڻ لڳو، ماحول مان آلودگي ختم ڪرڻ لاء ملڪي توڙي غيرملڪي مالياتي ادارن جي تعاون سان وڻن جي نئين سر پوکي لاء ھلندڙ پراجيڪٽ مڪمل طور تي ناڪام. سجاول ۽ ٽنڊو محمد خان فاريسٽ رينج جي مختلف ٻيلن کڏي، مولچند، کيرسر، ھديراڻي، فتع پور، مولچند پڪو ۽ ٻين ٻيلن ۾ ٻيلي کاتي جي راشي عملي جي سرپرستي ھيٺ وڻن جي واڍي وارو عمل وڏي پئماني تي جاري آھي،مختلف ٻيلن مان روزانو ڪيتريون ئي ڪاٺ سان ڀريل گاڏيون وڪري لاء وڃن ٿيون، جڏھن تہ گھاٽن وڻن جي ھيٺين پاڙ واري حصي جي صفائي لاء ٻيلي کاتي جي عملي طرفان لکين روپين عيوض ڪاٺ جي واپارين کي ٺيڪا ڏئي ڇڏيا آھن، جيڪي صفائي جي بھاني سري عام قيمتي وڻ وڍي رھيا آھن،رپورٽ موجب: فاريسٽ کاتي جي راشي عملي مختلف ٻيلن اندر ڪاٺ مان ڪوئيلو ٺاھيندڙ افغاني پٺاڻن کي پڻ ٺيڪا ڏئي ڇڏيا آھن، جيڪي سري عام وڻ وڍي ان مان ڪوئيلو تيار ڪري وڏي اگھ ۾ وڪرو ڪري رھيا آھن.ھتان جي عوام حڪومت ۽ ٻين ادارن کان مطالبو ڪيو آھي، تہ ٻيلن مان ناياب وڻن جي نسل ڪشي کي روڪي ملوث ماڻھن خلاف سخت ڪارروائي وڃي.