عمر ڪوٽ لڳ پرائمري اسڪول جو استاد غير حاضر، ٻارن جو مستقبل داءَ تي

127 views | 08th Sep 2023 • سنڌي خبرون

استاد شوڪت سميجو اسڪول ۾ ٻار پڙھائڻ بدران وڏيرن جي اوطاقن تي ويھي وقت گذارڻ لڳو

عمر ڪوٽ(رپورٽر) عمر ڪوٽ جي غريب آباد لڳ گورنمينٽ پرائمري اسڪول ڳوٺ حاجي جمال سميجو جو استاد شوڪت سميجو اسڪول ۾ ٻار پڙهائڻ بدران وڏيرن جي بنگلن تي حاضري ڀرڻ ۾ مصروف، گلاب جي گلن جھڙن ٻارن جو مستقبل داءَ تي لڳي ويو، ماءُ پيءَ پاران ٻارن کي سينگاري سنواري اسڪول اماڻن ٿا پر اتان جو استاد اسڪول بدران بنگلن ۽ هوٽلن تي ويهي گلن جھڙن ٻارن جي مستقبل کي داءَ تي لڳائي ڇڏيو، اسڪول ۾ مقرر استاد ساڳئي ڳوٺ جو رهواسي آھي جيڪو اسڪول کي حڪومت طرفان مليل فرنيچر اسڪول بجاءِ پنهنجي گهر ۾ سينگاري رکي ۽ ٻارن کي ڪنهن وڻ هيٺان سرن جي دڪي تي ويهڻ لاءِ مجبور آھن. ڳوٺ حاجي جمال سميجو جي رھواسي اعليٰ عملدارن کان گذارش آھي ته اهڙي ڊيوٽي چور استاد خلاف قانوني ڪاروائي ڪئي وڃي ۽ اسان جي گلاب جهڙن ٻارن جو مستقبل بچايو وڃي.