سنڌ پنجاب بلوچستان دنگ وٽ چئن ڏينهن کان لڳل ڌرڻو ختم، مغوين جي وارثن جي ڇتي نعريبازي

ساگر ڪمار کي 24ڪلاڪن ۾ بازياب ڪرائڻ جي خاطري تي ڌرڻو ختم

ڪشمور (دلبر جاني) ڪشمور ۾ سنڌ پنجاب بلوچستان سرحدي دنگ وٽ لڳل ڌرڻو ختم ٿي ويو، ھندو پنچائت ۽ ايس ايس پي امجد شيخ ۾ مغوي ساگر ڪمار جي بازيابي لاءِ لڳل ڌرڻي متعلق ڳالهيون ڪامياب ٿيون، ايس ايس پي مغوي ساگر ڪمار کي 24 ڪلاڪن اندر بازياب ڪرائڻ جي خاطري ڪرائي ڌرڻو ختم ڪرايو، جنهن بعد ڪشمور ڪنڌڪوٽ انڊس هاءِ وي روڊ تي ٽريفڪ جي رواني بحال ٿي وئي، ڌرڻي کي ختم ڪرڻ واري اعلان کانپوءِ مغوي نازيبا کوسو ۽ ڪوثر کوسو سميت ٻين مغوين جي وارثن پاران ايس ايس پي امجد شيخ جي موجودگي ۾ سندس خلاف سخت نعريبازي ڪئي وئي، گذريل ڏينهن بازياب ڪرايل مکي جگديش جئديپ ۽ ڊاڪٽر منير نائچ ڊيلنگ تحت ڀنگ ڀرڻ عيوض بازياب ڪرائڻ جو الزام لڳايو ويو، مغوي نازيبا کوسو ۽ ڌيءَ ڪوثر کوسو جي وارثن پاران ڌرڻي واري هنڌ سخت احتجاج رڪارڊ ڪرايو ويو مغوي نازيبا جي وارثن جو چوڻ هو ته رياست ۾ قانون لاڳو ڪندڙ ادارا 9 مھينا اڳ ڪنڌڪوٽ مان اغوا ٿي ويل ڳورھاري عورت نازيبا کوسو ۽ سندس ڌيءَ ڪوثر کوسو کي بازياب ڪرائڻ ۾ ناڪام ٿي ويا آهن