سجاول ۾ ايس ٽي پي پاران نينگري فاطمه ۽ صحافي جان محمد مهر جي قتل خلاف ريلي

معصوم فاطمه کي وحشت جو نشانو بڻائيندڙ ۽ سينئر صحافي جي قاتلن کي ڦاهي ٽنگيو وڃي: اڳواڻ

سجاول (گلشيرميربحر) ايس ٽي پي سجاول پاران معصوم فاطمہ ڦرڙو ۽ صحافي جان محمد مھر جي قاتلن خلاف ريلي ڪڍي احتجاج ڪيو ويو۔ سنڌ ترقي پسند پارٽي سجاول پاران مرڪز جي سڏ سجاول ۾ مامون لاڏو چوڪ کان پبلڪ پارڪ تائين احتجاجي ريلي ڪڍي پبلڪ پارڪ اڳيان احتجاجي مظاهرو ڪيو ويو۔ مظاهري ۾ ايس ٽي پي اڳواڻن ۽ ڪارڪنن سميت وڏي انگ ۾ شهرين شرڪت ڪئي۔ احتجاجي مظاھري کي ايس ٽي پي ضلعي نائب صدر محمد جمن سنڌي، ضلعي رابطا سيڪريٽري ممتاز علي لغاري، تعلقي صدر ريحان بوبڪ، صوفي سنگت جي اڳواڻ سلطان کوسو ۽ ٻين خطاب ڪندي چيو تہ راڻيپور ۾ پيرن جي حويلي ۾ وهشياڻو تشدد ۽ ڏاڍائي ڪري قتل ڪيل معصوم فاطمہ ڦرڙو سڄي سنڌ جي نياڻي آهي، هن جي قاتلن پيرن کي معصوم فاطمہ جو خون ڪڏهن بہ معاف نہ ڪبو، قانون قاتل پير اسد شاھ سميت معصوم فاطمہ سان ٿيل ظلم ۽ قتل ۾ ملوث سمورن جوابدارن کي عبرتناڪ سزا ڏئي سندس وارثن سان انصاف ڪري۔ هنن چيو تہ حق ۽ سچ جي ڳالهہ ڪندڙ سينيئر صحافي جان محمد مھر جو قتل انتهائي ڏوکائيندڙ عمل آهي، جان محمد مهر سکر جي مظلوم عوام جو سگهارو آواز هو جنهن کي بيگناھ قتل ڪري وڏو ظلم ڪيو ويو آهي، سندس قتل ۾ ملوث جوابدارن کي سخت سزا ڏني وڃي۔ هنن وڌيڪ چيو تہ سنڌ جي مظلوم نياڻي فاطمہ ڦرڙو ۽ صحافي جان محمد مهر جي ناحق خون سان جلد کان جلد انصاف نہ ڪيو ويو تہ ايس ٽي پي پاران سڄي سنڌ ۾ احتجاج جو دائرو وڌايو ويندو۔ احتجاج ۾ تعلقي جنرل سيڪريٽري سڪندر آمڙو، فاروق شيدي، ماجد ڀان، شيراز ملاح، الھبخش پارھيڙي ۽ ٻين وڏي انگ ۾ شرڪت ڪئي۔