نوشهروفيروز ۾ پراونشل هاءِ ويز انجنيئر جي مبينا ڪرپشن خلاف ٺيڪيدار سراپا احتجاج

انجنيئر مسرور سولنگي ٺيڪا رشوت عيوض من پسند ماڻهن کي ڏنا آهن، جاچ ڪئي وڃي: فدا چانڊيو ۽ ٻيا

نوشهروفيروز ( نمائندو) پراونشل هاء ويز کاتي جي انجنيئر جي ٺيڪن ۾ من پسند ماڻهن تي خاص نوازش، ٺيڪيدار ايسوسيئيشن جي سڏ تي احتجاج، انصاف جو مطالبو، تفصيلي خبر موجب نوشھروفيروز ۾ ٺيڪيدار ايسوسيئيشن پاران پراونشل ھاء ويز جي انجنيئر مسرور سولنگي جي ٽينڊرن ۾ مبينا ڪرپشن ۽ ميرٽ جي لتاڙ ڪري من پسند ٺيڪيدارن کي نوازڻ خلاف فدا حسين چانڊيو، عمير خانزادي ۽ صابن جوڻيجي جي اڳوڻي ۾ ڊي سي آفيس ٻاهران ڌرڻو هڻي نعريبازي ڪئي وئي. ڊپٽي ڪمشنر آفيس نوشھروفيروز ٻاھران احتجاجي ڌرڻي ۾ متاثر ٺيڪيدارن ۽ سوشل ورڪرز شرڪت ڪري پراونشل هاء ويز جي انجنيئر جي زيادتين خلاف نعريبازي ڪئي. ان موقعي تي ميڊيا سان ڳالهائيندي احتجاج ڪندڙ ٺيڪيدارن چيو ته پراونشل هاء ويز کاتي جي انجنيئر مسرور سولنگي ٺيڪن ۾ مها ڪرپشن ڪري صرف پنهنجي من پسند ماڻهن کي نوازيو آهي، ميرٽ جي لتاڙ ٿيڻ سبب ڪيترائي اهل ٺيڪيدار قانوني حق کان محروم آهن، هنن نگران وڏي وزير جسٽس رٽائرڊ باقر نقوي کي اپيل ڪئي ته نوشهري فيروز ۾ مقرر ڪرپٽ پراونشل هاء ويز انجنيئر مسرور سولنگي خلاف انڪوائري ڪري ٺيڪا شفاف طريقيڪار تحت جاري ڪيا وڃن.