مسوڀرڳڙي جي ڳوٺاڻن جو ڊي ايس پي ھٽڙي جي آفيس آڏو ڌرڻو

ولي محمد خاصخيلي، مولي ڏنو خاصخيلي سميت مختلف ڳوٺن جي رهواسين پاران بدامني خلاف ڌرڻو ھنيو ويو

حيدرآباد(بيورو) مسوڀرڳڙي ڀرسان ڳوٺ ولي محمد خاصخيلي، مولي ڏنو خاصخيلي سميت مختلف ڳوٺن جي رهواسين چورين جي آزار خلاف ڊي ايس پي ھٽڙي جي آفيس آڏو قومي عوامي تحريڪ جي اڳواڻ الطاف خاصخيلي، محب علي خاصخيلي، نادر علي، اقبال احمد، عطا محمد، شاھنواز خاصخيلي ۽ ٻين جي اڳواڻي ۾ مظاھرو ڪري ڌرڻو ھنيو. ان موقعي تي قومي عوامي تحريڪ جي مرڪزي سينيئر جوائنٽ سيڪريٽري الطاف خاصخيلي خطاب ڪندي چيو تہ علائقي ۾ بدامني ۽ منشيات وڌي وئي آھي. روزانو چوريون ۽ ڦرون ٿي رھيون آھن. پوليس خاموش تماشائي بنيل آھي. جيڪڏھن بدامني تي ڪنٽرول نہ ٿيو تہ ھاء وي تي ڌرڻو ھنيو ويندو. ھوڏانھن ڊي ايس پي شڪيل سولنگي ڌرڻي واري هنڌ پهچي مظاھرين سان ڳالھيون ڪيون. متاثر ڳوٺاڻن خاوند بخش خاصخيلي، عطا محمد ۽ شاھنواز خاصخيلي ڊي ايس پي کي ٻڌايو تہ 3 چور 21 آگسٽ جي رات جو گھرن ۾ گھڙي سندوقون چوري ڪري فصلن ۾ انھن جا تالا ٽوڙي سونا زيور، روڪ رقم ۽ ڪپڙن جا جوڙا چوري ڪري ويا. ھر مھيني 4/5 چوري جون وارداتون پيش اچن ٿيون. ھٽڙي، ڇلگري ۽ ٻڍاڻي ٿاڻن جي پوليس رڳو اين سي داخل ڪري خاموش ٿي وڃي ٿي ۽ ڪارروائي نٿي ڪئي وڃي. ان موقعي تي ڊي ايس پي شڪيل سولنگي ۽ ڇلگري ٿاڻي جي ايس ايچ او مھتاب کھاوڙ چيو تہ چورن کي بخش نہ ڪيو ويندو. چورن کي جلد گرفتار ڪيو ويندو ۽ ڳوٺاڻن کي تحفظ ڏنو ويندو.