ترقي پسند تحريڪ زبير رحمان جي ذڪر کانسواء اڌوري ۽ نامڪمل آھي: وليم صادق/گل منگي

بابو لادو، اين ڊي مجروح ڪالاڻي، نديم سبطين، عبدالخالق زدران، واحد بلوچ، نعيم شيخ، ڪامريڊ گل ناز،۽ ٻين خطاب ڪيو

ڪراچي (پ ر) ترقي پسند تحريڪ زبير رحمان جي ذڪر کانسواء اڌوري ۽ نامڪمل آھي۔ کاٻي ڌر هر تحريڪ ۾ حصو وٺندڙ زبير رحمان پاڪستان ۾ انارڪي جو اهم ٿنڀ هو جنهن مرڻ گهڙي تائين پنهنجي اصولن تي ڪا به سوديبازي نه ڪئي۔ زبير رحمان جي موت جي ذميوار غربت ۽ مفلسي آھن۔ اهڙن خيالن جو اظھار سرگرم انارڪسٽ ساٿين وليم صادق، بابو لادو، شھيد هيمون ڪالاڻي ميموريل سوسائٽي جي ڪنوينر اين ڊي مجروح ڪالاڻي، مشھور شاعر نديم سبطين، عبدالخالق زدران، واحد بلوچ، نعيم شيخ، گل محمد منگي، ڪامريڊ گل ناز،۽ ٻين زبير رحمان جي پهرين ورسي جي تقريب کي خطاب ڪندي ڪيو جيڪا ورڪرز سوليڊيرٽي فيڊريشن پاران اڄ ڇنڇر ڏينهن ملهائي وئي جنهن ۾ مرحوم کي خراج عقيدت پيش ڪيو ويو۔ تقريب ۾ جڙانوالا سانحي، راڻيپور جي فاطمه ڦرڙو کي مرشد پاران ظلم ۽ زيادتي جو نشانو بڻائي قتل ڪرڻ جي ڏک ۾ ٻن منٽن جي خاموشي اختيار ڪئي وئي۔ زبير رحمان کي خراج عقيدت پيش ڪندي ڪامريڊ ساٿين چيو ته مرحوم بنگلاديش جي آزادي واري تحريڪ ۾ بهرو ورتو ۽ اتي ٿيندڙ ظلم ۽ زيادتين جو اکين ڏٺو شاهد هو۔ هنن چيو ته زبير رحمان پاڪستان ۾ انارڪي کي ڦھلائڻ ۽ ان جي واڌ ويجھ ۾ اهم ڪردار ادا ڪيو۔ جنهن جي ڏوھ ۾ زبير رحمان سڄي ڄمار ڀوڳيو ۽ مرڻ گهڙي تائين جدوجهد ۾ مصروف رهيو۔ هن ڪڏهن به ڪنهن جي آڏو آڻ نه مڃي ۽ پنهنجي مقصد خاطر هر شئي قربان ڪري ڇڏي۔ زبير رحمان آرامده زندگي کي سوچي سمجهي ٿڏي ڇڏيو ۽ ڪنڊن جي سيج جي چونڊ ڪئي۔ اڄ زبير رحمان توڙي جو اسان سان گڏ نه آھي پر اسان سمجهون ٿا ته سندس فڪر ۽ سوچ وک وک تي اسانجي رهنمائي ڪري رهيا آھن۔ هنن چيو ته زبير رحمان هڪ مفڪر، صحافي ۽ انارڪزم جو استعارو آھي جنهن جي فڪر جي روشني ايندڙ نسلن کي به رهنمائي فراهم ڪندي رهندي۔