سراج الحق جي اپيل تي مھانگائي ۽ پئٽرول اگھن ۾ واڌ خلاف اڄ سنڌ ۾ احتجاجي مظاھرا ڪيا ويندا

306 views | 17th Aug 2023 • سنڌي خبرون

پيٽروليم مصنوعات جي قيمتن ۾ ڳاٽي ٽوڙ اضافي خلاف ڪراچي کان ڪشمور سنڌ ۾ احتجاجي مظاهرا ڪيا ويندا: ترجمان

ڪراچي (اسٽاف رپورٽر) جماعت اسلامي سنڌ نگران سرڪار پاران پيٽرول ۽ ڊيزل جي اگهن ۾ ڳاٽي ٽوڙ اضافي جي شديد مذمت ڪندي ان کي شهباز حڪومت جو تسلسل قرار ڏيندي چيو آهي ته غيرن جي غلام قيادت آءِ ايم ايف جي ڊڪٽيشن تي عوام مٿان پيٽرول بمباري ڪيرائي جيئڻ به مشڪل بڻائي ڇڏيو آهي، ان ظالماڻي قدم خلاف امير جماعت اسلامي سراج الحق جي اپيل تي جمعي ڏينهن اڄ ملڪ گير احتجاج جي سلسلي ۾ ڪراچي کان ڪشمور ڀرپور احتجاجي مظاهرا ڪيا ويندا. صوبائي ترجمان مجاهد چنا پاران جاري ڪيل بيان ۾ وڌيڪ چيو ويو ته عوام اڳ ۾ ئي بيروزگاري، بُک بدحالي ۽ بجلي توڙي گيس جي قيمتن ۾ اضافي تي پريشان مٿان وري هڪ مهيني اندر پيٽرول 37 ۽ ڊيزل جي قيمت ۾ 40 رپين جو اضافو عوام مٿان بجلي بڻجي ڪريو آهي ڇو ته پيٽرول جي قيمت ۾ اضافي سان ٽرانسپورٽ ڪراين سميت روزاني استعمال ٿيندڙ واهپي وارين شين جي قيمتن ۾ پڻ ڳاٽي ٽوڙ اضافو ٿي ويندو آهي جنهن سان عام ماڻهن جو جيئڻ مشڪل ٿيو پوي. بجٽ خسارو ختم ڪرڻ ۽ حڪمرانن جي عياشين کي پورو ڪرڻ لاءِ سمورو بار عوام مٿان وجهڻ سراسر ظلم آهي، هن مطالبو ڪيو ته عوام جي حياتي تنگ ڪرڻ بدران وي آءِ پي ڪلچر جي خاتمي، حڪمرانن توڙي بيوروڪريسي جي مراعات جو خاتمو ۽ سادگي توڙي ڪفايت شعاري جي پاليسي تي عمل ڪري آءِ ايم ايف کان هميشه لاءِ جند آجي ڪرائي وڃي.