ڪراچي جي سهراب ڳوٺ ٽائون ۾ صفائي سٿرائي نه ٿيڻ خلاف احتجاج

سهراب ڳوٺ ٽائون گندگي جي ور چڙهيل آهي، هر طرف گندگي ۽ گندو پاڻي آهي: اڳواڻ

گڏاپ (محمد علي خاصخيلي)ڪراچي جي سهراب ڳوٺ ٽائون کي پيئرس بڻائيندڙن جا خواب اڌورا رهجي ويا ڪيترن ئي هنڌن تي گندگي جو گندو پاڻي تلاءَ ۾ تبديل ٿي ويو آهي ۽ سڄو شهر گندگي جو ڍير بڻجي ويو آهي، جنهن سبب علائقي واسين شڪايتون ڪيون آهن. ٽائون چيئرمين لالا رحيم ۽ يوسي 3 جي چيئرمين خلاف احتجاج ڪيو. ايوب ڳوٺ راڄپر محلا ۾ سماجي اڳواڻ اسلم شاهاڻي، ياسين جمالي، الاهي بخش ڀاڳت، ايڊووڪيٽ آصف علي ٻرڙو ، ڪاظم علي راڄپر، راشد علي شاهاڻي، فرمان علي پنهور ۽ ٻين جي اڳواڻي ۾ پريس ڪلب آڏو احتجاجي مظاهرو ڪيو ويو. ان موقعي تي اڳواڻن چيو ته سھراب ڳوٺ ٽائون انتظاميا جي لاپرواهي ۽ نااهلي سبب ايوب ڳوٺ ۾ ڪيترن ئي هنڌن تي سيوريج جو پاڻي تلاءُ بڻجي ويو آهي ۽ هر طرف گندگي جا ڍير لڳل آهن پر انتظاميه ڪچرو هٽائڻ لاءِ تيار ناهي احتجاج ڪندڙن وڌيڪ چيو ته احتجاج ڪرڻ اسان جو جمهوري حق آهي هنن چيو ته اسان جو مطالبو آهي ته اسان جي علائقي ۾ صفائي سٿرائي جو نظام بهتر ڪيو وڃي، ڪراچي جي ميئر مرتضيٰ وهاب ۽ ڊپٽي ميئر سلمان عبدالله مراد ان ڳالهه جو نوٽيس وٺن، هنن چيو ته جيڪڏهن ايوب ڳوٺ ۾ صفائي جو نظام بهتر نه ڪيو ويو ته پوءِ ڪراچي پريس ڪلب آڏو احتجاج ڪيو ويندو.