قومي عوامي تحريڪ پاران ڪارونجھر جي ٻيھر نيلامي خلاف تحريڪ جو اعلان

ڪارونجھر سنڌ جي تھذيبي ۽ ثقافتي ورثو آھي، پ پ حڪومت سنڌ جي وحدت ۽ وسيلن تي حملي آور آھي: اياز لطيف پليجو

حيدرآباد(بيورو) قومي عوامي تحريڪ ڪارونجھر جي ٻيھر نيلامي خلاف 4 آگسٽ تي سڄي سنڌ ۾ ريلين، مظاھرن ۽ ڌرڻن جو اعلان ڪيو آھن. قومي عوامي تحريڪ جي سربراھ اياز لطيف پليجي چيو آهي تہ ڪارونجھر سنڌ جي تھذيبي ۽ ثقافتي ورثو آھي. پيپلز پارٽي حڪومت سنڌ جي وحدت ۽ وسيلن تي حملي آور آھي.اياز لطيف پليجي چيو تہ آصف زرداري ٽولو 15 سالن کان سنڌ تي قابض تي ھر شئي نيلام ڪري رھيو آھي. 18ھين ترميم جي نالي ۾ اربين روپين جي ڪرپشن ڪئي وئي. بيھر اقتدار لاءِ 18ھين ترميم تان ھٿ کڻي سنڌ جا وسيلا وفاق کي ڏنا ويا. ڪڏھن ٻيٽن جو سودو، ڪڏھن بندرگاهن جو سودو، ڪراچي، ڪوھستان، ساحلي پٽي لينڊ مافيا حوالي ڪئي وئي آھي. گريٽر ٿل ڪئنال ۽ ٻيا ڌاڙيل واھ تعمير ڪرائي پيپلز پارٽي حڪومت سنڌو درياھ سڪائي ڇڏيو آھي. تيل، گئس، ڪوئلو ھجڻ باوجود سنڌ جا ماڻھو بکون ڪاٽڻ تي مجبور آھن. زرخيز زمينون ڀڙڀانگ ٿي ويون آھن. صنعتي ادارا ختم ٿي ويا آھن. اياز لطيف پليجي چيو تہ پيپلز پارٽي اقتدار خاطر جيڪا بہ جوڙ توڙ ڪري سندن مرضي آھي پر اقتدار خاطر سودي ۾ سنڌ جي وحدت، مالڪي ۽ وسيلا وڪڻڻ کي سنڌ جو عوام ڪڏھن بہ قبول نہ ڪندو۔ اياز لطيف پليجي چيو تہ ڪارونجھر جي نيلام خلاف 3 آگسٽ تي مٺي ۾ جلسي عام ڪيو ويندو ۽ 4 آگسٽ تي سڄي سنڌ ۾ ريليون، مظاھرو ۽ ڌرڻا ھنيا ويندا. سنڌ جو لکين عوام ڪارونجھر جي نيلام کي رد ڪري چڪو آھي. جيڪڏھن پ پ حڪومت ڪارونجھر جي نيلامي بند نہ ڪئي تہ احتجاج جو دائرو وڌايو ويندو.