سنڌ جي ورهاست ڪنهن بہ صورت ۾ قبول نہ ڪئي ويندي: صوبائي وزير علي حسن زرداري

سجاول (رپورٽر) صوبائي وزير جيل خانا جات ۽ ورڪس اينڊ سروسز حاجي علي حسن زرداري سجاول لڳ نودو ٻارڻ پهچي پاڪستان پيپلز پارٽي تعلقي سجاول جي صدر ڊاڪٽر اقبال ميمڻ سان سندس ڀاء ۽ پيپلز پارٽي سجاول جي سرگرم اڳواڻ عبداللطيف ميمڻ سان سندس سئوٽ جي وڇوڙي تي تعزيت ڪئي ۽ مرحوم جي ايصال ثواب لاء فاتحه خواني ڪئي. ان موقعي تي صوبائي وزير لائيو اسٽاڪ ۽ فشريز محمد علي خان ملڪاڻي پڻ ساڻس گڏ موجود هو. صوبائي وزيرن مرحوم جي مغفرت، بلند درجن ۽ وارثن لاء صبر جميل جي دعا گهري. بعد ۾ ميڊيا سان ڳالهائيندي حاجي علي حسن زرداري چيو تہ گريڊ هڪ کان چار تائين جي نوڪرين لاءِ ميرٽ جو ڪو واضح طريقي ڪار موجود ناهي، جيڪڏهن ڪنهن وٽ ان حوالي سان ڪو قابل عمل معيار موجود آهي تہ اهو آگاهه ڪري. هن چيو تہ پاڪستان پيپلز پارٽي سڄي سنڌ ۾ ترقياتي منصوبن تي تيزي سان ڪم ڪري رهي آهي ۽ ضلعي سجاول ۾ ڪيڊٽ ڪاليج سميت ٻيا تعليمي ادارا پڻ قائم ڪيا ويندا. هن وڌيڪ چيو تہ ٺٽو–سجاول ڊيول ڪيريج روڊ سميت سمورا مين روڊ تعمير ڪيا ويندا، جڏهن تہ ضلعي سجاول جي عوام کي بهتر سهولتون فراهم ڪرڻ لاءِ سموريون ضروري سرڪاري آفيسون پڻ قائم ڪيون وينديون. صحافين جي هڪ سوال جي جواب ۾ حاجي علي حسن زرداري چيو تہ ضلعي ٺٽي ۾ ڪنهن صحافي خلاف داخل ڪيل ڪيس بابت کيس ڪا ڄاڻ ناهي. هن واضح ڪيو تہ سنڌ جي ورهاست ڪنهن بہ صورت ۾ قبول نہ ڪئي ويندي، ۽ چيئرمين بلاول ڀٽو زرداري جو جيڪو موقف آهي، اهو ئي پاڪستان پيپلز پارٽي ۽ ان جي سموري قيادت جو گڏيل موقف آهي. ان موقعي تي سنڌ اسيمبلي جي ميمبر ادي ريحانہ لغاري، چيئرمين ضلعي ڪائونسل سجاول دانش خان ملڪاڻي، چيئرمين ضلعي ڪائونسل ٺٽو عبدالحميد پهنور، اقبال موسيٰ چانڊيو، ارباب رميز ميمڻ، پاڪستان پيپلز پارٽي ٺٽي جي اڳواڻ ڊاڪٽر عبدالواحد سومرو، شاهنواز لوهار، پير رحماني، عبدالغني بگهيار سميت پاڪستان پيپلز پارٽي سجاول ۽ ٺٽي جا ٻيا اڳواڻ ۽ ڪارڪن پڻ موجود هئا.