ڊي سي ٺٽو سرمد علي ڀاڳت جي صدارت ھيٺ اجلاس

اجلاس ۾ پوليو بوسٽر ڊوز مھم جي حوالي سان غور ويچار ڪيو ويو

ٺٽو(محمد شفيق ڀٽي)ڊپٽي ڪمشنر ٺٽو سرمد علي ڀاڳت جي صدارت هيٺ سندس آفيس ۾ پوليو بوسٽر ڊوز مهم بابت هڪ اهم اجلاس منعقد ٿيو، جنهن ۾ صحت، تعليم، ڊبليو ايڇ او (WHO)، يونيسيف (UNICEF) ۽ ٻين لاڳاپيل ادارن جي آفيسرن شرڪت ڪئي. اجلاس کي خطاب ڪندي ڊپٽي ڪمشنر هدايت ڪئي ته سمورن سرڪاري ۽ نجي اسڪولن مان چار مهينن کان ڏهن سالن تائين عمر وارن ٻارن جو مڪمل ۽ درست ڊيٽا حاصل ڪري، پوليو بوسٽر ڊوز مهم دوران انهن سڀني ٻارن کي لازمي طور تي ويڪسين لڳائي وڃي. هن چيو ته نگراني واري نظام کي وڌيڪ اثرائتو ۽ مضبوط بڻايو وڃي، جيئن ضلعي کي مليل سئو سيڪڙو هدف ڪاميابي سان حاصل ڪري سگهجي. هن وڌيڪ چيو ته پوليو بوسٽر ڊوز بابت عوام ۾ شعور ۽ آگاهي پيدا ڪرڻ انتهائي ضروري آهي. ان مقصد لاءِ ڀرپور آگاهي مهم هلائي وڃي، جڏهن ته سيمينار ، ورڪشاپون ۽ ڪميونٽي آگاهي پروگرام پڻ منعقد ڪيا وڃن ، جيئن والدين کي ٻارن جي حفاظتي ويڪسينيشن جي اهميت کان آگاهه ڪري سگهجي. اجلاس کي ٻڌايو ويو ته ضلعي ٺٽي ۾ پوليو بوسٽر ڊوز مهم دوران هڪ لک 92 هزار 539 ٻارن کي ويڪسين لڳائڻ جو هدف مقرر ڪيو ويو آهي. مهم تحت چار مهينن کان ڏهن سالن تائين عمر جي سڀني ٻارن کي پوليو جي بوسٽر ڊوز ڏني ويندي، جڏهن ته خاص طور تي وڌيڪ خطري وارن (هاءِ رسڪ) علائقن ۽ خاص يونين ڪائونسلن تي وڌيڪ ڌيان ڏنو ويندو، جيئن ٻارن جي قوت مدافيعت ۾ اضافو اچي ۽ کين پوليو جهڙي موذي بيماري کان محفوظ رکيو وڃي. ڊپٽي ڪمشنر سرمد علي ڀاڳت سڀني لاڳاپيل کاتن ۽ ڀائيوار ادارن تي زور ڏنو ته هو پاڻ ۾ ڀرپور سھڪار ، مؤثر رابطي ۽ گڏيل حڪمت عملي تحت پوليو بوسٽر ڊوز مهم کي ڪامياب بڻائڻ لاءِ پنهنجو ڀرپور ڪردار ادا ڪن، جيئن ضلعي ٺٽي کي پوليو کان پاڪ رکڻ واري قومي مقصد جي حاصل ڪرڻ ۾ مؤثر اڳڀرائي يقيني بڻائي سگهجي.