ٺٽو: اي ڊي سي ون عمران الحق جي صدارت ھيٺ اجلاس

ٺٽو( محمد شفيق ڀٽي) ايڊيشنل ڊپٽي ڪمشنر ون عمران الحق جي صدارت هيٺ دربار هال مڪلي ۾ حضرت امام حسينؑ جي چهلم جي موقعي تي امن امان، سيڪيورٽي ۽ عزادارن کي بهترين سهولتون فراهم ڪرڻ لاءِ ڪيل انتظامن جو جائزو وٺڻ بابت اهم اجلاس منعقد ٿيو. اجلاس ۾ اسسٽنٽ ڪمشنرن، مختيارڪارن، پوليس، رينجرز، صحت کاتي، حيسڪو، پبلڪ هيلٿ انجنيئرنگ، ريسڪيو 1122، ايمبولينس سروسز، ميونسپل ڪميٽي، ٽائون ڪميٽين، پي پي ايڇ آءِ سميت مختلف لاڳاپيل کاتن جي آفيسرن سميت شيعه ۽ سني عالمن ۽ مجلسن ۽ جلوسن جي منتظمن پڻ اجلاس ۾ شرڪت ڪئي. اجلاس دوران حضرت امام حسينؑ جي چهلم جي موقعي تي منعقد ٿيندڙ مجلسن ۽ نڪرندڙ جلوسن جي پرامن انعقاد، فول پروف سيڪيورٽي، ٽريفڪ جي رواني، صفائي سٿرائي، بجلي ۽ پاڻي جي بنا رڪاوٽ فراهمي، اسٽريٽ لائيٽ، طبي امداد، ايمبولينس سروسز، هنگامي صورتحال کي منهن ڏيڻ لاءِ ڪيل انتظامن ۽ لاڳاپيل ادارن جي پاڻ ۾ رابطن جو تفصيلي جائزو ورتو ويو. ايڊيشنل ڊپٽي ڪمشنر ون عمران الحق لاڳاپيل کاتن جي عملدارن کي هدايت ڪئي ته هو حضرت امام حسينؑ جي چهلم جي موقعي تي پنهنجون ذميواريون مڪمل ذميواري، گڏيل سهڪار ۽ مؤثر هم آهنگي سان سرانجام ڏيڻ ته جيئن عزادارن کي هر ممڪن سهولت فراهم ڪري سگهجي ۽ سڀئي مذهبي اجتماع ۽ جلوس پرامن، محفوظ ۽ منظم انداز ۾ پڄاڻي تي پهچن. هن لاڳاپيل ادارن کي هدايت ڪئي ته جلوسن جي مقرر رستن تي صفائي، روشني، پاڻي جي فراهمي، طبي سهولتن ۽ ٽريفڪ جي مؤثر نگراني کي هر صورت ۾ يقيني بڻايو وڃي، جڏهن ته سيڪيورٽي ادارا حساس هنڌن تي خاص ڌيان ڏين ته جيئن ڪنهن به اڻ وڻندڙ واقعي کي مؤثر نموني سان منهن ڏئي سگهجي. ايڊيشنل ڊپٽي ڪمشنر ون سمورن مڪتبِ فڪر جي عالمن کي اپيل ڪئي ته هو اتحاد، اتفاق، مذهبي هم آهنگي، رواداري ۽ ڀائيچاري جي فروغ لاءِ پنهنجو ڀرپور ڪردار ادا ڪن ته جيئن ضلعي ٺٽي ۾ امن امان جي فضا برقرار رهي ۽ حضرت امام حسينؑ جو چهلم نهايت عقيدت، احترام ۽ پرامن ماحول ۾ ملهايو وڃي.