ڊي سي ٺٽو سرمد علي ڀاڳت جي صدارت هيٺ اين جي اوز جو اجلاس

هاليجي ڍنڍ سميت ضلعي ٺٽي جا تاريخي، ثقافتي ۽ قدرتي ماڳ سنڌ جو قيمتي ورثو آهن: سرمد علي ڀاڳت

ٺٽو( محمد شفيق ڀٽي)ڊپٽي ڪمشنر ٺٽو سرمد علي ڀاڳت جي صدارت هيٺ ڊپٽي ڪمشنر آفيس ۾ اين جي اوز جو اهم اجلاس منعقد ٿيو، جنهن ۾ ايڊيشنل ڊپٽي ڪمشنر وليد احمد ڏاوچ، پرو وائيس چانسلر سنڌ يونيورسٽي ڪيمپس ميڊم مسباح قريشي، ایڈیشنل ڊائريڪٽر سوشل ويلفيئر خدا بخش بهراڻي ۽ مختلف اين جي اوز جي نمائندن شرڪت ڪئي.ان موقعي تي ڊپٽي ڪمشنر سرمد علي ڀاڳت اين جي اوز جي نمائمدن کي هدايت ڪئي ته 13 آگسٽ تي هاليجي ڍنڍ تي منعقد ٿيندڙ ثقافتي ميلي ۾ ڀرپور شرڪت ڪري خوبصورت ثقافتي اسٽال قائم ڪن ۽ پاڪستان جي جشن آزادي جي مناسبت سان قومي جهنڊن ذريعي هاليجي ڍنڍ جي ماحول کي وڌيڪ پرڪشش بڻائڻ ۾ پنهنجو ڪردار ادا ڪن.هن چيو ته هاليجي ڍنڍ سميت ضلعي ٺٽي جا تاريخي، ثقافتي ۽ قدرتي ماڳ سنڌ جو قيمتي ورثو آهن، جن کي عالمي سطح تي متعارف ڪرائڻ اسان سڀني جي گڏيل ذميواري آهي.هن وڌيڪ چيو ته ٺٽو ٽن سؤ سالن کان وڌيڪ عرصي تائين سنڌ جي گاديءَ جو هنڌ رهيو آهي ۽ تعليم، تهذيب ۽ تمدن جو اهم مرڪز رهيو آهي.ڊپٽي ڪمشنر چيو ته ڪينجهر ڍنڍ، مڪلي، شاهجهان مسجد، ڀنڀور، هاليجي ڍنڍ ۽ سامونڊي پٽي جهڙا ماڳ دنيا جي سياحن لاءِ وڏي ڪشش رکن ٿا، تنهن ڪري اهڙين سرگرمين ذريعي ٺٽي جي تاريخي، ثقافتي ۽ سياحتي سڃاڻپ کي وڌيڪ اجاگر ڪرڻ وقت جي اهم ضرورت آهي.اجلاس ۾ شرڪت ڪندڙن هاليجي ڍنڍ تي منعقد ٿيندڙ ثقافتي ميلي کي ڪامياب بڻائڻ لاءِ مڪمل سهڪار جي خاطري ڪرائي، جڏهن ته ڊپٽي ڪمشنر سرمد علي ڀاڳت اميد ظاهر ڪئي ته هي ميلو نه رڳو هاليجي ڍنڍ جي عالمي اهميت کي اجاگر ڪندو پر جشن آزادي جي قومي جذبي کي پڻ هٿي ڏيندو.