ملير: بوائز ڊگري ڪاليج گلشن حديد ۾ بي ضابطگين جو انڪشاف

ڊگري ڪاليج جي عمارت استاد،پروفيسر توڙي عملو نھ اچڻ سبب ڀوت بنگلي جو ڏيک ڏيڻ لڳي

ملير (رپورٽ: عبدالرشيد مورجھريو) گورنمينٽ بوائز ڊگري ڪاليج گلشن حديد پپري بن قاسم، گڊاپ ٽائون ملير جي مبينا خراب صورتحال تي مقامي شهرين ۽ سماجي حلقن سخت ڳڻتي جو اظهار ڪندي ان کي مستقبل جي نسلن سان ناانصافي قرار ڏنو آهي شهرين جو چوڻ آهي ته ڪاليج ۾ تدريسي ۽ انتظامي معاملا سوالن جي گهيري ۾ اچي ويا آهن. سندن مطابق ڪاليج ۾ عملي، استادن، پروفيسرن ۽ انتظاميا جي غير موجودگي بابت شڪايتون سامهون اچي رهيون آهن، جڏهن ته ڪجهه حلقن پاران "ڀوت ملازمن" جي موجودگي جا الزام پڻ هنيا پيا وڃن ذريعن موجب، هن معاملي جون تفصيلون صوبائي وزير تعليم سردار شاهه ۽ سندس پرسنل سيڪريٽري ۽ ڪوآرڊينيٽر کي پڻ موڪليون ويون آهن، جڏهن ته شهرين مطالبو ڪيو آهي ته جيڪڏهن فوري ۽ شفاف جاچ نه ڪئي وئي ته معاملو قومي احتساب جي لاڳاپيل ادارن آڏو پڻ اٿاريو ويندو مقامي ماڻهن چيو ته هي صرف هڪ تعليمي اداري جو مسئلو ناهي، پر علائقي جي نوجوانن جي مستقبل ۽ تعليم جي حق جو معاملو آهي. هنن سنڌ حڪومت ۽ تعليم کاتي کان مطالبو ڪيو ته ڪاليج جي صورتحال جو فوري نوٽيس وٺي، حاضري رڪارڊ، تدريسي سرگرمين ۽ انتظامي معاملن جي مڪمل جاچ ڪرائي ذميوارن خلاف قانوني ڪارروائي ڪئي وڃي شهرين اهو به چيو ته هو تعليمي ادارن ۾ مبينا ڪرپشن ۽ غفلت خلاف پنهنجو آواز بلند ڪندا رهندا ته جيئن ايندڙ نسلن کي معياري ۽ بهتر تعليمي سهولتون فراهم ٿي سگهن.