ملير: ڄام ڳوٺ ۾ پوليس مقابلو، 3 ڄڻا مارجي ويا، هڪ زخمي

ملير (رپورٽ: عبدالرشيد مورجھريو) ڄام ڳوٺ ۾ حضرت ابراهيم شاهه بخاري جي مزار ڀرسان پوليس ۽ مبينا جوابدارن وچ ۾ مقابلو ٿيو، جنهن جي نتيجي ۾ ٽن جوابدارن جي مارجي وڃڻ ۽ هڪ جي زخمي ٿيڻ جي اطلاع ملي آهي. پوليس ذريعن موجب مقابلي دوران فائرنگ جي ڏي وٺ ۾ مارجي ويل ۽ زخمي جوابدارن کي فوري طور ايمبولينسن ذريعي جناح پوسٽ گريجوئيٽ ميڊيڪل سينٽر منتقل ڪيو پيو وڃي، جتي قانوني ڪارروائي ۽ ضروري طبي جاچ جاري آهي.مارجي ويل جوابدارن جي سڃاڻپ 27 ورهين جي شاهه رخ ولد افتخار خان، 48 ورهين جي راهب ولد مسرت ۽ 26 ورهين جي علي حمزه ولد نذير طور ٿي آهي، جڏهن ته زخمي جوابدار جي سڃاڻپ 29 ورهين جي وسيم احمد ولد محمد صفدر طور ڪئي وئي آهي.شروعاتي اطلاعن موجب پوليس علائقي کي گهيري ۾ وٺي ثبوت گڏ ڪرڻ جو عمل شروع ڪري ڇڏيو آهي، جڏهن ته واقعي بابت وڌيڪ جاچ جاري آهي. پوليس اختيارين جو چوڻ آهي ته جوابدارن جي ڏوهن واري رڪارڊ ۽ مقابلي جي سببن بابت ڄاڻ حاصل ڪئي پئي وڃي، جڏهن ته حتمي موقف جاچ مڪمل ٿيڻ کانپوءِ سامهون ايندو. واقعي کانپوءِ علائقي ۾ سيڪيورٽي وڌيڪ سخت ڪئي وئي آهي ۽ پوليس جي اضافي نفري پڻ مقرر ڪئي وئي آهي.