ملير: سيڪريٽري ڪاليج ايجوڪيشن پاران نون تعمير ٿيندڙ ڪاليجن جي ڪمن جو معائنو

سيڪريٽري ڪاليج ايجوڪيشن نديم الرحمان ميمڻ لاڳاپيل آفيسرن سان گڏ ميمڻ ڳوٺ جو دورو ڪيو

ملير (رپورٽ: عبدالرشيد مورجھريو) سيڪريٽري ڪاليج ايجوڪيشن سنڌ نديم الرحمان ميمڻ لاڳاپيل کاتي جي آفيسرن سان گڏ ميمڻ ڳوٺ جو دورو ڪيو جتي هن نئين تعمير ٿيندڙ گورنمينٽ گرلز ڊگري ڪاليج ۽ گورنمينٽ بوائز ڊگري ڪاليج ۾ شهيد غلام مرتضيٰ بلوچ آڊيٽوريم ۽ لائبريري سميت جاري ترقياتي ڪمن جو تفصيلي جائزو ورتو دوري دوران سيڪريٽري ڪاليج ايجوڪيشن کي ڪاليجن ۾ جاري تعميراتي ڪمن جي رفتار، معيار ۽ مڪمل ٿيڻ بابت بريفنگ ڏني وئي. هن لاڳاپيل آفيسرن کي هدايت ڪئي ته تعميراتي ڪم مقرر وقت اندر مڪمل ڪيا وڃن ته جيئن علائقي جي شاگردن کي معياري ۽ بهتر تعليمي سهولتون فراهم ڪري سگهجن. ان موقعي تي سوشل ڊولپمينٽ آرگنائيزيشن جي جنرل سيڪريٽري رمضان ميمڻ، پاڪستان پيپلز پارٽي پي ايس-85 جي سينيئر نائب صدر ابوبڪر ميمڻ، انجنيئر اشرف ميمڻ ۽ حفيظ ميمڻ سميت علائقي واسين ۽ ڪاليج انتظاميا پاران سيڪريٽري ڪاليج ايجوڪيشن کي درپيش مسئلن، بنيادي سهولتن جي کوٽ ۽ تعليمي ضرورتن بابت آگاهي فراهم ڪئي مقامي نمائندن ڪاليجن ۾ فرنيچر، اسٽاف جي کوٽ، ٽرانسپورٽ ۽ ٻين انتظامي معاملن بابت پڻ نشاندهي ڪئي، جنهن تي سيڪريٽري ڪاليج ايجوڪيشن مسئلن جي جلد حل لاءِ يقين ڏياريو. هن چيو ته حڪومت سنڌ تعليمي ادارن جي بهتري ۽ نوجوانن کي اعليٰ تعليم جون بهتر سهولتون مهيا ڪرڻ لاءِ سنجيده قدم کڻي رهي آهي ان موقعي تي وائيس چيئرمين سليم ميمڻ، راشد غلام حسين ميمڻ، اسلم ميمڻ ۽ ٻيا معزز شهري پڻ موجود هئا، جن ميمڻ ڳوٺ ۾ تعليمي منصوبن کي علائقي لاءِ خوش آئند قرار ڏيندي اميد ظاهر ڪئي ته انهن منصوبن جي مڪمل ٿيڻ سان ملير جي شاگردن کي پنهنجي ئي علائقي ۾ معياري تعليم حاصل ڪرڻ جا وڌيڪ موقعا فراهم ٿيندا.