نوشهروفيروز ۾ جسقم بشير قريشي جي سڏ تي احتجاج

ٻٻرلوءِ ڌرڻي تي پوليس ڪاھھ ۽ گرفتارين جي سخت مذمت

نوشهرو فيروز (ڊر )جسقم شهيد بشير خان جي مرڪزي سڏ تي ٻٻرلو بائي پاس تي پريا ايڪشن ڪاميٽي جي ڌرڻي تي پوليس جي لاٺي چارج، اڳواڻن جي گرفتاري ۽ جسقم شهيد بشير خان جي مرڪزي جنرل سيڪريٽري پنهل ساريو سميت ٻين قومي ڪارڪنن مٿان دهشتگردي ٽوڙ عدالت (اي ٽي سي) تحت داخل ڪيل ڪيسن خلاف جسقم نوشهرو فيروز پاران پريس ڪلب نوشهرو فيروز اڳيان احتجاجي مظاهرو ڪيو ويو. احتجاج ۾ اڳواڻن چيو ته پريا ڪماري ۽ ٻين معصوم ٻارڙن جي آزادي لاءِ جاري پرامن ڌرڻي تي پوليس تشدد ڪري بنيادي انساني حقن جي ڀڃڪڙي ڪئي آهي، جيڪا سخت مذمت جوڳي آهي. هنن مطالبو ڪيو ته گرفتار ڪيل اڳواڻن ۽ ڪارڪنن کي فوري طور آزاد ڪيو وڃي ۽ سندن خلاف داخل ڪيل ڪوڙا ڪيس ختم ڪيا وڃن. احتجاج جي اڳواڻي جسقم شهيد بشير خان جي ضلعي جنرل سيڪريٽري اياز راڄپر، ضلعي پريس سيڪريٽري فريد لاشاري، رحمان تڳر، ڪاشف ميمڻ، عزيز ابڙو، شهري ايڪشن ڪاميٽي جي اڳواڻ نويد راڄپر ۽ ٻين قومي ڪارڪنن ڪئي. مظاهرين نعريبازي ڪندي چيو ته جيڪڏهن سندن مطالبا تسليم نه ڪيا ويا ته احتجاج جو دائرو وڌيڪ وسيع ڪيو ويندو.