بھه جي واپارين جي سڄي سنڌ ۾ هڙتال، ڪراچي ۾ چاري جي کوٽ

بُھھ جي واپارين پاران پوليس جي مبينا زيادتين خلاف سڄي سنڌ ۾ ٽن ڏينهن کان هڙتال جاري

ملير (رپورٽ: عبدالرشيد مورجھريو) بُھھ جي واپارين پاران پوليس جي مبينا زيادتين، رشوت خوري ۽ ڪيسن جي داخلا خلاف سڄي سنڌ ۾ ٽن ڏينهن کان جاري هڙتال سبب ڪراچي ۾ چاري جي شديد کوٽ پيدا ٿي وئي آهي، جنهن جي نتيجي ۾ لکين چوپايو مال متاثر ٿيڻ ۽ کير جي بحران جو خدشو پيدا ٿي ويو آهي.ڀينس ڪالوني ۾ شهزاد سليم ۽ آصف بيگ جي اڳواڻي ۾ واپارين ۽ ڊرائيورن وڏي احتجاجي ريلي ڪڍي، جنهن ۾ دادو، ڄامشورو، سجاول ۽ ٺٽو ضلعن جي پوليس، موٽروي پوليس ۽ ٽريفڪ پوليس خلاف سخت نعريبازي ڪئي وئي. احتجاج دوران پوليس جي وڏي نفري پڻ واقعي واري هنڌ پهچي وئي احتجاج ڪندڙن الزام هنيو ته پوليس مختلف چوڪين تي گاڏين کان مبينا طور 5 هزار کان 10 هزار رپيا رشوت وٺي ٿي، تشدد ڪيو وڃي ٿو ۽ ڪوڙا ڪيس پڻ داخل ڪيا وڃن ٿا. سندن چوڻ هو ته هڪ گاڏي کي ڪراچي تائين پهچائڻ لاءِ لڳ ڀڳ 50 هزار رپيا خرچ ڪرڻا پون ٿا، جنهن سبب ڪاروبار تباهه ٿي رهيو آهي واپارين جو چوڻ هو ته ٽن ڏينهن کان ڪراچي ۾ ڀُو نه پهچڻ سبب شهر ۾ لڳ ڀڳ 10 لک چوپايو مال بک جي ور چڙهيل آهي، جڏهن ته کير جي پيداوار پڻ سخت متاثر ٿيڻ جو امڪان آهي. هنن چيو ته جيڪڏهن صورتحال برقرار رهي ته مال جي فوتگين جي ذميواري حڪومت تي هوندي مظاهري کي خطاب ڪندي اڳواڻن چيو ته سڄي سنڌ ۾ احتجاج جاري آهي، پر حڪومت ۽ لاڳاپيل اختيارين ڪو به نوٽيس نه ورتو آهي. هنن خبردار ڪيو ته جيڪڏهن سندن جائز مطالبا تسليم نه ڪيا ويا ته نيشنل هاءِ وي تي ڌرڻو هنيو ويندو ۽ هڙتال جو دائرو وڌيڪ وڌايو ويندو.واپارين حڪومت کان مطالبو ڪيو ته پوليس جي مبينا زيادتين جو فوري نوٽيس وٺي چاري جي فراهمي بحال ڪرائي وڃي، ٻي صورت ۾ ڪراچي کي شديد کير جي بحران کي منهن ڏيڻو پئجي سگهي ٿو.