عمرڪوٽ ۾ پوليس ڪانسٽيبل جي ٽيسٽ پاس ڪندڙ اميدوار سراپا احتجاج

ڪامياب اميدوارن آفر آرڊر جاري نه ٿيڻ خلاف الله والا چوڪ تي احتجاجي مظاهرو ڪندي ڌرڻو هنيو

عمرڪوٽ (رپورٽ:ڪانجي مل رکيسر) عمرڪوٽ ۽ ٿرپارڪر ضلعن ۾ SPD-01 پوليس ڪانسٽيبل ڀرتي جي جسماني ٽيسٽ، لکت واري امتحان ۽ انٽرويو جا سمورا مرحلا ڪاميابي سان مڪمل ڪندڙ اميدوارن آفر آرڊر جاري نه ٿيڻ خلاف الله والا چوڪ تي احتجاجي مظاهرو ڪندي ڌرڻو هنيو، جنهن سبب ڪجهه وقت لاءِ روڊ بلاڪ ٿي ويو ۽ ٽريفڪ جي رواني سخت متاثر ٿي، احتجاج ۾ عمرڪوٽ، ڪنري، سامارو، پٿورو، ڍورونارو، ڇور، نيو ڇور ۽ ضلعي جي ٻين ننڍن وڏن شهرن مان وڏي انگ ۾ ڪامياب اميدوارن شرڪت ڪئي، مظاهرين هٿن ۾ بينر ۽ پلي ڪارڊ کڻي سنڌ حڪومت ۽ پوليس اختيارين خلاف نعريبازي ڪئي، احتجاج جي اڳواڻي غلام مرتضيٰ پلي، محمد آدم مهر، وقاص ڪنڀر، رجب منڱريو، راحيل طاهر آرائين، جمال چوپاڻ، مرتضيٰ منڱريو ۽ ٻين ڪئي، ان موقعي تي ڳالهائيندي اڳواڻن چيو ته هو هڪ سال اڳ پوليس ڪانسٽيبل ڀرتي جي فزيڪل ٽيسٽ، لکت واري امتحان ۽ انٽرويو ۾ ڪاميابي حاصل ڪري چڪا آهن، پر اڃان تائين کين آفر آرڊر جاري نه ڪيا ويا آهن، جنهن سبب هو سخت ذهني پريشاني، بيچيني ۽ معاشي مشڪلاتن کي منهن ڏئي رهيا آهن، مظاهرين مطالبو ڪيو ته سنڌ حڪومت، قانون واري وزير ۽ پوليس جي اعليٰ اختيارين فوري طور عمرڪوٽ ۽ ٿرپارڪر جي سمورن ڪامياب اميدوارن کي آفر آرڊر جاري ڪري انتظار جي ڪيفيت ختم ڪن، هنن خبردار ڪيو ته جيڪڏهن سندن جائز مطالبا جلد منظور نه ڪيا ويا ته احتجاج جو دائرو سڄي صوبي تائين وڌايو ويندو.